194اوقاف جائیدادوں کی تفصیل کرناٹکا گزٹ میں شامل : مساجد، مدارس، درگاہیں اب اوقاف کی جائیداد
منگلورو:27/فروری (ایس او نیوز)سرکاری اور نجی زمینا ت پربغیر سروے کے یوں ہی باقی رہنے والی منگلورو تعلقہ کے 112اداروں کی 194وقف جائیدادکی تفصیل ’’ کرناٹکا گزٹ ‘‘ میں شائع کی گئیہے۔
کرناٹکا ریاستی اقلیتی فلاح وبہبود ، حج اور اوقاف دفتر کی جانب سے وقف قانون 1995دفعہ 5(2)کے تحت تعلقہ کی قریب 75،95،75ایکڑ زمین کا سروے کیاگیا تھا، جس کی تفصیلات کرناٹکا وقف بورڈ کی طرف سے جانچ پڑتال کرنے کے بعد کرناٹکا کے گزٹ میں مصدقہ طورپر شائع کیا گیا تھا۔ اس کا سب سے بڑا فائدہ یہ ہوگا کہ جن زمینات کی آرٹی سی نہیں ہوئی تھی اب ان زمینات کی آرٹی سی دستیاب ہوگی۔
سال 1968میں دکشن کنڑا ضلع کی سیکڑوں اوقاف جائیداد کا سروے کئے جانے کے بعد اب تک کوئی سروے نہیں کیا گیا تھا۔ اس کو دیکھتے ہوئے محکمہ اوقاف نے اوقاف جائیداد کے سروے کے لئے ہدایات جاری کی تھیں جس پر سنجیدگی سے عمل کرتے ہوئے دکشن کنڑا ضلع کے محکمہ اوقاف نے سروے کرکے اوقاف کی زمینا ت کو مصدقہ طورپر رجسٹریشن کی کوشش کی تھی اس کا پھل اب مل رہاہے، جو ایک واقعی قابل ستائش کام ہے۔ اس طرح مساجد، مدارس، درگاہیں اوقاف کی جائیداد میں شمار کی جائیں گی ، موصولہ اطلاع کے مطابق ابھی کئی اوقاف جائیداد کا سروے ہونا باقی ہے ، اس کے لئے بھی کوششیں جاری رہنے کی بات کہی گئی ہے۔