بنگلورو:21/اپریل(ایس او نیوز) منڈیا کے ملولی تعلقہ میں کل بی جے پی کارکنوں کی طرف سے وزیر اعلیٰ سدرامیا کی کار کا گھیراؤ کرنے اور انہیں کالی جھنڈیاں دکھانے کی کوشش کے دوران غفلت برتنے والے منڈیا ضلع کے ایس پی کو وزیر اعلیٰ سدرامیا کی لتاڑ کو وزیر داخلہ ڈاکٹر جی پرمیشور نے درست قرار دیا۔ چکمگلور میں اخباری نمائندوں سے بات چیت کرتے ہوئے انہوں نے کہاکہ جو بی جے پی کارکن وزیر اعلیٰ کو کالی جھنڈیاں دکھانے جمع ہوئے تھے، ان میں سے اگر کوئی وزیر اعلیٰ پر پتھر برسادیتا تو کیا ہوتا؟۔ اسی لئے وزیر اعلیٰ سدرامیا کی طرف سے جو لتاڑ دی گئی ہے وہ اپنی جگہ درست ہے۔انہوں نے کہاکہ اس سلسلے میں انہوں نے خود منڈیا کے ایس پی سے بات چیت کی ہے اور ساتھ ہی یہ واقعہ جہاں رونماہوا وہاں متعین پولیس افسران کی لاپرواہی کے خلاف کارروائی کی بھی ہدایت دی ہے۔ ضمنی انتخابات میں کامیاب ہونے کے بعد آئی سی یو میں داخل کانگریس کی حالت میں قدرے سدھار کے متعلق اپوزیشن لیڈر جگدیش شٹر کے بیان کو غیر ذمہ دارانہ قرار دیتے ہوئے ڈاکٹر پرمیشور نے کہاکہ انہیں ذمہ داری سے بیان بازی کرنی چاہئے۔ اسی طرح کے من مانے بیانات کی وجہ سے 2013 میں ریاستی عوام نے بی جے پی کو اقتدار سے باہر کا راستہ دکھایاتھا۔ انہوں نے کہاکہ بی جے پی کے دور اقتدار میں 20حلقوں کے ضمنی انتخابات کروائے گئے ان انتخابات میں بی جے پی نے شراب اور پیسہ پانی کی طرح بہایا۔ اب وہ کانگریس پر بیہودہ الزام لگارہی ہے کہ پیسے کو پانی کی طرح بہاکر کانگریس نے یہ انتخاب جیتا ہے۔