جسٹس جینت کی حمایت میں منڈیا وکلاء کا احتجاج
منڈیا یکم اکتوبر(ایس او نیوز) الہ آباد ہائی کورٹ تبادلہ یہ ناراضی جتاتے ہوئے مستعفی ہونے والے ریاستی ہائی کورٹ کے جسٹس جینت کی حمایت میں کل ہند وکلاء تنظیم کے کارکنان نے ضلعی عدالت کے روبرو احتجاجی دھرنا دیا۔ عدالتی کارروائی کا بائیکاٹ کرتے ہوئے وکلاء تنظیم کے کارکنان نے کہاکہ جسٹس جینت پٹیل کو گجرات ہائی کورٹ میں چیف جسٹس بننے کا موقع ہاتھ آیا تھا۔ لیکن یہ موقع سیاست کی بھینٹ چڑھ گیا۔ جینت کو چیف جسٹس بنانے کے بجائے عبوری و ہنگامی چیف جسٹس بناتے ہوئے انصاف کی مندر میں انصاف کا خون کیا گیا۔ اس کے بعد جینت کو گجرات ہائی کورٹ سے کرناٹک ہائی کورٹ تبادلہ کردیا گیا۔ یہاں کے چیف جسٹس ایس کے مکھرجی کی میعاد کار ختم ہونے کو ہے۔ ان کے سبکدوشی کے بعد سینئرٹی کی بنیاد پر جسٹس جینت کو چیف جسٹس بنایا جانا تھا، لیکن ان کو چیف جسٹس کے عہدہ سے دور رکھنے کی خاطر انتہائی شاطر انداز میں یہاں سے الہ آباد ہائی کورٹ تبادلہ کردیا گیا، جو سراسر ناانصافی ہے، جسٹس جینت نے اپنے ساتھ ہوئے ناانصافی کی مذمت میں استعفیٰ دے دیا ہے۔ یہ استعفیٰ ایک احتجاجی طریقہ کار ہے، ان کے استعفیٰ دینے سے عدلیہ کو کلہاڑی کی ضرب لگی ہے۔ احتجاجی مظاہرین نے مزید کہا کہ جسٹس جینت کو انصاف کے دائرہ کار میں ملنے والی ترقی کو سیاسی کارندے روک لگارہے ہیں۔ مرکزی حکومت کی یہ چال سراسر ناانصافی ہے، حق تلفی ہے، انصاف کے تقاضوں کو ملیامیٹ کرنے کی سازش ہے۔