ممبئی، 23؍جولائی(ایس اونیوز/آئی این ایس انڈیا )مہاراشٹر اے ٹی ایس اور کیرالہ پولیس کے مشترکہ آپریشن میں دہشت گرد تنظیم آئی ایس آئی ایس کے لیے نوجوانوں کو بھرتی کرنے کے الزام میں مبینہ طور پر ملوث ایک شخص کو پڑوسی تھانے ضلع سے گرفتار کر لیا گیا۔ایک سینئر اے ٹی ایس افسر کے مطابق گرفتارکئے گئے شخص کی شناخت رضوان خان کے طور پر ہوئی ہے۔اسے کل رات تھانے ضلع کے کلیان میں واقع اس کے گھر سے گرفتار کیا گیاہے ۔افسر نے بتایا، چونکہ گرفتاری کیرالہ پولیس نے کی ہے، اس لیے ہم لوگوں کے پاس بہت زیادہ تفصیلات نہیں ہے۔ذرائع نے بتایا کہ خان آئی ایس آئی ایس کے لیے نوجوانوں کو بھرتی کرنے کے لیے مبینہ طور پر ذمہ دارتھا۔تبدیلی مذہب سے منسلک مسائل کو لے کر کیرالہ میں اس کے خلاف ایک مقدمہ بھی درج کیا گیا ہے۔پولیس نے بتایاکہ خان کو کیرالہ لے جایا جائے گا جہاں افسران معاملے کی تحقیقات کریں گے۔