تیونس،29مارچ(ایس او نیوز/آئی این ایس انڈیا)تیونس کی پارلیمنٹ کے ایک عہدیدار نے بتایا ہے کہ پولیس نے چاقو بردار ایک شخص کو پارلیمنٹ میں داخل ہونے سے روکنے کے بعد حراست میں لیا ہے۔غیر ملکی خبررساں اداروں کے مطابق چاقو سے لیس ایک مشتبہ حملہ آور نے منگل کو دارالحکومت تیونسیہ میں قائم پارلیمنٹ ہاؤس میں گھسنے کی کوشش کی تھی تاہم پولیس نے اسے پکڑ لیا ہے۔ ذرائع کا کہنا ہے کہ پولیس ملزم سے تفتیش کر رہی ہے تاہم اس حوالے سے مزید تفصیلات سامنے نہیں آئیں۔ایک دوسرے ذریعے کا بھی کہنا ہے کہ گرفتار شخص کے قبضے سے ایک تیز دھار چاقو بھی برآمد کیا گیا ہے۔تیونس میں سرکاری سطح پر اس خبر کی تصدیق یا تردید نہیں کی گئی اور نہ ہی پولیس نے کسی مشکوک حملہ آور یا اس کے خطرناک ارادوں کے بارے میں کچھ بتایا ہے۔
مقامی ایف ایم ریڈیو چینل ’شمس‘ نے خاتون رکن پارلیمان زینب البراہیمی کا ایک بیان نقل کیا ہے جس میں ان کا کہنا ہے کہ طلبہ کے ایک گروپ میں موجود ایک نوجوان نے پارلیمنٹ میں اس وقت گھسنے کی کوشش کی تھی جب ایوان کا اجلاس جاری تھا۔خیال رہے کہ تیونس میں دو سال پیشتر باردو میوزیم میں ہونے والے حملے کے بعد سیکیورٹی مسلسل ہائی الرٹ ہے۔ پارلیمنٹ سے متصل باردو عجائب گھر میں فائرنگ کے نتیجے میں متعدد افراد ہلاک ہوگئے تھے جن میں غیرملکی سیاح بھی شامل تھے۔