جرمنی : پولیس نے برلن کیتھڈرل میں گھسنے والے شخص کو گولی مار دی
برلن 4جون (ایس او نیوز؍ آئی این ایس انڈیا ) جرمنی کے دارالحکومت برلن میں پولیس نے ایک کیتھڈرل میں گھسنے والے شخص کو گولی مار دی ہے۔اس واقعے کے بعد پولیس نے شہر کے وسط میں واقع اس تاریخی کیتھڈرل کا محاصرہ کر لیا ہے۔پولیس نے ایک ٹویٹ میں اطلاع دی ہے کہ اتوار کو مقامی وقت کے مطابق چار بجے ( 1400 جی ایم ٹی) کے بعد برلن کیتھڈرل پر دھاوا بولنے والے ایک شخص پر پولیس اہلکاروں نے گولی چلائی ہے اورگولی اس کی ٹانگ میں لگی ہے۔فوری طور پر اس شخص کی عمر اور قومیت کے بارے میں پتا نہیں چل سکا ہے۔برلن میں پروٹیسٹنٹ عیسائیوں کے اس مرکزی کیتھڈرل میں فائرنگ کے اس واقعے میں کسی اور شخص کے زخمی ہونیکی بھی کوئی اطلاع نہیں ہے۔فرانسیسی خبررساں ایجنسی اے ایف پی کے ایک رپورٹر نے جائے وقوعہ سے اطلاع دی ہے کہ پولیس نے اپنی سرخ اور سفید ٹیپ سے عمارت کے داخلی راستوں کو بند کردیا ہے اور وہاں خود کار ہتھیاروں سے مسلح متعدد پولیس اہلکار گشت کررہے تھے۔جرمنی کی خبررساں ایجنسی ڈی پی اے کی اطلاع کے مطابق واقعے کے بعض عینی شاہدین کو نفسیاتی کونسلنگ کے لیے وہاں سے کلینک لے جایا گیا ہے۔