ڈاکٹروں کی طرف سے مردہ قرار دیا گیانوجوان آخری رسومات کے وقت ہوگیا زندہ؛ گلبرگہ میں پیش آیا عجیب وغریب واقعہ
کلبرگی13؍جولائی (ایس او نیوز)افضل پور تعلقہ کے گنگا پور نامی علاقے میں ڈاکٹروں نے ایک نوجوان کی موت واقع ہونے کی تصدیق کردی۔ عین جوانی میں موت واقع ہونے کی وجہ سے رشتے دار اور پاس پڑوس والے انتہائی رنجیدہ تھے۔ پھر اس کی آخری رسومات ادا کرنے کی تقریباً تمام تیاریاں مکمل ہوگئیں تو اس نے معجزاتی طورپر اچانک آنکھیں کھولیں اورسانس لینا شروع کردیا۔ اس موقع پر وہاں پر موجود تمام افراد حیرت و استعجاب میں ڈوب گئے۔
مردوہ قرار دئے جانے کے بعد دوبارہ زندہ ہونے والے شخص کا نام ایشور پواڈے(۳۴سال) بتایا جاتا ہے۔یہ شخص ممبئی کی ایک کمپنی میں ملازمت کررہا تھا اور چھٹی پر گھر آیا ہوا تھا۔ یہاں بیمار پڑنے پر اسے سولاپور کے ڈسٹرکٹ اسپتال میں علاج کے لئے داخل کیاگیا تھا۔ جب اس کی سانسیں چلنی بند ہوگئیں تو ڈاکٹروں نے اس کے فوت ہوجانے کی تصدیق کرتے ہوئے لاش گھر لے جانے کو کہا۔ ایمبولینس میں لاش گھر لانے کے بعد جب آخری رسومات کی تیاری جاری تھی تو کچھ لوگوں نے دیکھا کہ وہ سانسیں لینے لگا ہے۔ فوری طور پر اسے ڈسٹرکٹ اسپتال لے جایا گیاجہاں ا س کااب دوبارہ علاج ہورہا ہے اور وہ روبصحت بتایا جارہا ہے۔