مکہ المکرمہ :ماہ رمضان کے آخری عشرہ میں سکیورٹی انتظامات 70؍لاکھ فرزندان توحید نے عمرہ اداکیا

Source: S.O. News Service | By Shahid Mukhtesar | Published on 6th June 2018, 11:16 AM | خلیجی خبریں |

مکہ المکرمہ؍ریاض،5؍جون (ایس او نیوز؍ایجنسی) سعودی حکومت نے رمضان المبارک کے تیسرے عشرہ کے آغاز پر مکہ المکرمہ کے داخلی اور خارجی راستوں پر سخت حفاظتی اقدامات کیے ہیں، مسجد الحرام اور اطراف کے علاقوں میں فضائی سکیورٹی اور نگرانی بڑھا دی گئی ہے۔ ماہ رمضان کے موقع پر دنیا بھر سے فرزندان توحید عمرہ ادائیگی کیلئے سعودی عرب آتے ہیں۔ مسجد الحرام کے ارد گرد کے وسطیٰ علاقے میں واقع تمام ہوٹل رمضان المبارک کے آخری عشرے کے لئے ابھی سے فل ہوگئے ہیں، مکہ مکرمہ کے اس علاقے میں واقع ہوٹلوں کے1,62,000سے زیادہ کمرے ہیں۔اسی مناسبت سے سعودی عرب کے مقدس شہر مکہ مکرمہ میں واقع مسجد الحرام میں بھی رمضان المبارک کے دوران تمام راستوں کی سکیورٹی اور نگرانی بڑھا دی گئی ہے۔ سکیورٹی فورسز کے ہیلی کاپٹر مسلسل فضا میں گشت کررہے ہیں۔ ایوی ایشن سکیورٹی انچارج نے میڈیا کو بتایا کہ رمضان المبارک کے لئے سکیورٹی کے طے شدہ منصوبے پر عمل درآمد کیا جارہا ہے۔ مسجد الحرام میں آنے والے تمام زائرین پر نظر رکھی جارہی ہے۔ زائرین کی سکیورٹی کے لئے کاؤنٹر ٹیررازم یونٹ، ٹریفک پولیس اور سول ڈیفنس کے اہلکار مختلف مقامات پر تعینات ہیں۔پہلی مرتبہ زائرین کو منظم کرنے کے لئے ڈرونز کا استعمال کیا جائے گا، واضح رہے کہ مسجد الحرام میں لوگوں کی نقل وحرکت کی نگرانی کے لئے تقریباً 2,500؍ کیمرے بھی نصب ہیں۔ دریں اثناء سعودی وزارت حج و عمرہ نے پیر کے روز جاری ایک بیان میں بتایا ہے کہ دنیا کے مختلف ممالک سے آنے والے تقریباً70؍ لاکھ مسلمانوں نے رواں سیزن میں مکمل اطمینان اور سکون کے ساتھ روحانی فضاؤں میں عمرہ ادا کیا۔خادم حرمین شریفین اور ولی عہد کی ہدایات پر سعودی حکومت تمام تر صلاحیتوں اور اختیارات کو بروئے کار لائی۔ اس دوران معتمرین کی خدمت، دیکھ بھال اور سلامتی کے لئے تمام اہل افرادی قوت کو بھرتی کیا گیا۔وزارت کے بیان میں یہ بھی کہا گیا ہے کہ قطری حکام کے منفی موقف کے پیش نظر جس کے مطابق دوحہ حکومت قطر کے شہریوں اور وہاں مقیم کو مناسک حج اور عمرہ کی ادائیگی میں کامیاب نہیں ہونے دے رہی، سعودی وزارت حج و عمرہ قطری برادران کے عمرے کے لئے آنے کا خیر مقدم کرتی ہے۔ اس سلسلے میں قطری شہری جدہ کے کنگ عبدالعزیز انٹرنیشنل ایرپورٹ پر پہنچ کر اپنا اندراج اور ضابطے کی کارروائی مکمل کر سکتے ہیں۔ عمرے کے لئے آنے والے قطری شہری سعودی وزارت کی اس ویب سائٹ کے ذریعہ اپنا اندراج کروا سکتے ہیں ۔اسی ویب سائٹ کے ذریعہ معتمرین کو خدمات پیش کرنے والی منظور شدہ سعودی کمپنیوں کے ساتھ کنٹریکٹ کی کارروائی بھی عمل میں لائی جا سکتی ہے۔ قطری شہری دنیا کے دوسرے ممالک سے آنے والے عازمین عمرہ کی طرح اپنے لئے مناسب پیکیج کا انتخاب کر سکتے ہیں۔سعودی وزارت کے بیان کے مطابق رمضان ۱۴۳۹ ہجری کے دوران عمرے کا ارادہ رکھنے والے قطری شہری اور وہاں مقیم غیر ملکی افراد ما سوا ’’قطر ایرویز‘‘ کے دوسری کسی بھی فضائی کمپنی کے ذریعے کنگ عبدالعزیز انٹرنیشنل ایئرپورٹ کے راستے مملکت آ سکتے ہیں۔

ایک نظر اس پر بھی

ایران میں گرفتار اُترکنڑا کے ماہی گیروں کی فوری رہائی کا مطالبہ کرتے ہوئے کرناٹکا این آر آئی فورم کا دبئی میں ہندوستانی سفارت کار سے ملاقات

  ریاست کرناٹک کے ضلع اُترکنڑا کے 18 ماہی گیروں کی ایران میں گرفتاری کے بعد اُن کی رہائی کی کوششیں تیز ہوگئی ہیں۔ اس تعلق سے تازہ اطلاع یہ ہے کہ  دبئی میں موجود ماہی گیروں کے رشتہ داروں نے  کرناٹکا این آر فورم کے  اہم ذمہ دار اور قائد قوم جناب ایس ایم سید خلیل الرحمن صاحب سے ...