بنگلورو،18؍فروری(ایس او نیوز) وزیر اعلیٰ سدرامیا نے کہاکہ ریاستی حکومت کی طرف سے مضافات بنگلور میکے ڈاٹ میں پینے کے پانی کا منصوبہ ہر حال میں مکمل کیا جائے گا۔آج ارسیکیرے ٹاؤن میں سابق وزیراعظم ایچ ڈی دیوے گوڈا کے ہمراہ مختلف ترقیاتی پروگراموں کی شروعات کیلئے یہاں آمد کے بعد اخباری نمائندوں سے بات چیت کرتے ہوئے انہوں نے کہاکہ پینے کے پانی کیلئے کسی بھی پراجکٹ کیلئے کوئی قانونی رکاوٹ نہیں ہے اور نہ ہی یہ پراجکٹ کاویری آبی تنازعہ ٹریبونل کے دائرۂ اختیار میں آتا ہے۔انہوں نے کہاکہ میکے ڈاٹ میں اگر ڈیم تعمیر کیاجائے تو اس سے کرناٹک کو ہی نہیں،بلکہ تملناڈو کو بھی فائدہ ہوگا اور دونوں ریاستوں کے عوام کو پینے کا پانی میسر ہوگا۔ غیر ضروری سیاسی وجوہات کی بنیاد پر تملناڈو حکومت اس پراجکٹ کی مخالفت کررہی ہے، اس کے باوجود بھی ریاستی حکومت میکے ڈاٹ پراجکٹ شروع کرنے کی پابند ہے۔ سابق وزیراعلیٰ اور ریاستی جنتادل (ایس) صدر ایچ ڈی کمار سوامی کے اس بیان پر کہ ضمنی انتخابات لڑنے کیلئے کانگریس کے پاس امیدوار نہیں ہیں، وزیر اعلیٰ نے کہاکہ کانگریس کے پاس امیدواروں کی کوئی کمی نہیں ہے۔ سابق وزیر وی سرینواس پرساد کی طرف سے حال ہی میں سدرامیا کو دئے گئے چیلنج پر تبصرہ کرتے ہوئے وزیر اعلیٰ نے کہاکہ انتخابات میں ہار اور جیت عوام کے فیصلے پر منحصر ہے، سرینواس پرساد ایک سینئر لیڈر ہیں اسی لئے ان کے کسی بھی چیلنج کا وہ جوا ب دینا مناسب نہیں سمجھتے۔ انہوں نے کہاکہ بذات خود وہ یہ کبھی نہیں چاہتے کہ سرینواس پرساد کو ہرایا جائے ، لیکن عوام اگر کانگریس کا ساتھ دیں گے تو سرینواس پرساد کو اس کا خمیازہ بھگتنا پڑے گا۔