سڑکوں کی مرمت میں تاخیر پر عدالت پھر برہم، بی بی ایم پی کو بند کردینے کی وارننگ
بنگلورو،23؍اکتوبر(ایس او نیوز) شہرکی سڑکوں پر جابجا گڈھوں کو بند کرنے میں بی بی ایم پی کی تاخیر اور لاپروائی کی شکایات پر ایک بار پھر سخت برہمی کا اظہار کرتے ہوئے ریاستی ہائی کورٹ نے کہا ہے کہ بی بی ایم پی کو اگر شہر کی سڑکوں کی دیکھ بھال میں دشواری ہے تو بہتر ہے کہ بی بی ایم پی کو بند کردیا جائے۔ اس سلسلے میں عرضیوں کی سماعت کرتے ہوئے آج ہائی کورٹ نے بی بی ایم پی افسروں کو آڑے ہاتھوں لیا اور کہاکہ شہر کی سڑکوں پر گڈھے بند کرنے کے لئے بارہا ہدایت کے باوجود جس طرح کی لاپروائی کی جارہی ہے یہ ناقابل برداشت ہے۔افسروں کی لاپروائی کا خمیازہ عوام کو کیوں بھگتنا پڑے۔
عدالت نے تنبیہ کی کہ وقت مقررہ میں سڑکوں کی مرمت اور گڈھے بند کرنے کا کام پورا ہوجانا چاہئے، بصورت دیگر سنگین نتائج کا سامنا کرنا پڑے گا۔ اس سے پہلے بھی عدالت نے بارہا افسروں کو تنبیہ کی ہے لیکن غیر ذمہ داریوں کا سلسلہ رکنے کا نام نہیں لے رہا ہے۔افسروں کا یہ رویہ ناقابل برداشت ہے۔ بی بی ایم پی کے وکیلوں نے اس موقع پر اپنے حلف نامے میں عدالت کو بتایاکہ سڑکوں کے گڈھے بند کرنے میں تاخیر کے لئے وہ ذمہ دار نہیں ہیں،بلکہ بی ڈبلیو ایس ایس بی کے افسروں کی طرف سے پانی کی سپلائی کی مختلف کاموں کے لئے جو کھدائی کی جارہی ہے اس کی وجہ سے تاخیر ہورہی ہے۔
عدالت نے اس استلال کو مسترد کردیااور کہاکہ بی بی ایم پی اگر کام کرنا چھوڑ دے تو بنگلور بند نہیں ہوگا۔ شہر بنگلور کا انتظامیہ کسی بھی طرح چلتا رہے گا جس طرح بی بی ایم پی مسلسل لاپروائی برت رہی ہے اس سے ظاہر ہوتاہے کہ بی بی ایم پی ناکارہ ہوچکی ہے۔ ایسے ناکارہ بلدی ادارے کو برقراررکھنے اور نہ رکھنے میں کوئی معنی نہیں ہیں۔ اس مرحلے میں وکیلوں نے عدالت کو بتایاکہ عدالت کے حکم کے فوراً بعد کئی مقامات پر سڑکوں کی مرمت کاکام مکمل کرلیاگیا ہے، اس مرحلے میں ججوں نے ہدایت دی کہ جہاں بھی کام مکمل ہوا ہے ان مقامات کی تصاویر کے ساتھ رپورٹ عدالت میں داخل کی جائے۔