سلواسا:19/ جنوری (ایس اونیوز /آئی این ایس انڈیا) جہاں ایک طرف مغربی بنگال کے دارالحکومت کولکاتہ میں ترنمول کانگریس (ٹی ایم سی)کی صدر ممتا بنرجی کی قیادت میں متحدہ اپوزیشن نے مودی حکومت پر نشانہ لگایا تو وزیر اعظم نریندر مودی نے دمن-دیو اور دادر-ناگر حویلی کے سلواسا سے اپوزیشن پر حملہ کیا۔ انہوں نے کہا کہ اپوزیشن کامہاگٹھ بندھن صرف مودی کے خلاف نہیں بلکہ ہندوستان کی عوام کے خلاف بھی ہے۔اس دوران انہوں نے مہا گٹھ بندھن کے اتحاد پربھی طنزکسا۔وزیراعظم مودی نے کہاکہ مہاگٹھ بندھن بنانے میں شامل حزب اختلاف جماعتیں ابھی مکمل طور پرایک ساتھ آئیں بھی نہیں ہیں اور آپس میں مول بھاؤ شروع کر دیا ہے،کچھ لوگ خود کو بچانے کے لئے سہارا تلاش کر رہے ہیں،عالم یہ ہے کہ جو لوگ پہلے کانگریس کوپانی پی پی کرکوستے تھے، وہ بھی ایک اسٹیج پرآگئے ہیں،وہ پریشان ہیں کہ مودی غریبوں کے حقوق، ان کے راشن چھیننے والے بروکرز کو باہرکررہاہے؟۔انہیں دقت ہے کہ مودی بدعنوانی کے خلاف اتنا سخت کاروائی کیوں کررہے ہیں؟لیکن میں ملک کو آگے آگے بڑھانے کے لئے ’سب کاساتھ ،سب کاوکاس‘کے منترکولے کرنکل گیاہوں۔کولکاتہ میں ممتا بنرجی کی متحدہ انڈیا ریلی میں اپوزیشن کے جمع ہونے پر نشانہ لگاتے ہوئے پی ایم مودی نے کہاکہ مغربی بنگال میں بھارتیہ جنتا پارٹی(بی جے پی )کا صرف ایک رکن اسمبلی ہے، لیکن وہاں بی جے پی کی مخالفت میں ملک کے سارے لیڈران جمع ہو گئے کیونکہ ہم لوگ ہیں جو سچ کی راہ پر چلتے ہیں، لہذا ہمارے ایک ایم ایل اے سے بھی یہ لوگ ڈرگئے ہیں۔مغربی بنگال کی وزیر اعلی ممتا بنرجی سمیت دیگر اپوزیشن جماعتوں پر حملہ بولتے ہوئے انہوں نے کہا کہ جو اپنی ہی ریاست میں جمہوریت کو کچل رہے ہیں، وہ اب جمہوریت کو بچانے کا سبق دے رہے ہیں،یہ بہت حیرت انگیز بات ہے۔کولکاتہ میں اپوزیشن جماعتوں کی مشترکہ ریلی پر طنز کستے ہوئے پی ایم مودی نے کہا کہ جمہوریت کا گلا گھوٹنے والے جمہوریت کو بچانے کی بات کر رہے ہیں، یہ دیکھ کر ملک کے عوام کہتی ہے کہ واہ کیا منظر ہے!۔اس دوران وزیراعظم مودی نے دادرا نگر اور دامان دیو میں پہلے میڈیکل کالج کا افتتاح کیا۔اس کے بعد انہوں نے کہا کہ آج دادرا نگر اور دامان دیوکو آزادی کے بعد پہلا میڈیکل کالج ملا،اس میڈیکل کالج میں150نشستیں ہیں، لیکن مستقبل میں ان میں اضافہ ہو گا۔انہوں نے کہا کہ سب کا ساتھ سب کا وکاس کے منتر پر چل رہی مرکزی حکومت ترقی کی کے لئے مکمل طور پر وقف ہے، جس میں بچوں کی پڑھائی، بزرگوں کو ادویات، نوجوانوں کو کمائی، کسانوں کو آبپاشی اور عوام کام شامل ہیں۔