بنگلورو،28؍جولائی(ایس او نیوز) مہادائی تنازعے کی یکسوئی کے لئے جہاں حکومت کی طرف سے جدوجہد جاری ہے اسی درمیان کرناٹک کے خلاف عرضی داخل کرنے حکومت گوا کی کوشش کو آج اس وقت شدید دھکا پہنچا جب مہادائی ٹریبونل نے عرضی کو سماعت کے لئے منظور کرنے سے صاف انکار کردیا۔ حکومت گوا نے ٹریبونل سے رجوع ہوکر یہ عرضی دائر کی تھی کہ وہ دریائے مہادائی کا پانی ملاپربھا کی طرف نہیں بہائے گی۔ تاہم ٹریبونل نے اس عرضی کو سماعت کے لئے منظور کرنے سے انکار کرتے ہوئے کہا کہ 20اگست تک اس تنازعے کے سلسلے میں ٹریبونل کا قطعی فیصلہ منظر عام پر آجائے گا، حکومت گوااس وقت تک صبر کرے۔ اس سے پہلے بھی کرناٹک نے مہادائی مسئلے پر ٹریبونل کا فیصلہ اپنے حق میں کروانے کے لئے عرضی دائر کی تھی تو اسے بھی ٹریبونل نے انکار کردیا اور اعلان کیاتھا کہ 20 اگست تک ٹریبونل اپنا قطعی فیصلہ سنانے جارہا ہے، اسی لئے اس وقت تک ریاستی حکومت انتظار کرے۔