مدرسہ تعلیم الاسلام روشن محلہ ہوناور کے زیر اہتمام قرآن کوئز مسابقہ
ہوناور،5؍مارچ (ایس او نیوز/ذرائع ) مدرسہ تعلیم الاسلام روشن محلہ کے زیر اہتمام مورخہ 2/ مارچ کو ایک عظیم الشان قرآن کوئز مسابقہ کا انعقاد کیا گیا، جس میں ہوناور اور کمٹہ کے منتخب شبینہ مکاتب کے طلبہ شریک رہے۔ مظاہرہ بے حد دلچسپ رہا اور حاضرین نے طلبا کو خوب داد و تحسین سے نوازا۔
پروگرام کے مقصد کے تعلق سے بتایا گیا کہ بچوں میں قرآن سے مناسبت پیدا ہو اور بچوں میں تلاوت کے ساتھ آیات کے معنی و مفہوم معلوم کرنے کا شوق پیدا ہو۔
واضح رہے کہ شریک ہونے والے طلبہ کو قرآن کے متعلق تقریبا ڈیڑھ سو سوالات مع جوابات دئیے گیے تھے، اس کے علاوہ ہر مرحلہ میں قرآن ہی سے متعلق آزاد سوالات پوچھےگئے، طلبہ نے ان کے جوابات دے کر حاضرین کا دل جیت لیا، مسابقہ کی صدارت مہتمم جامعہ اسلامیہ بھٹکل مولانا مقبول صاحب ندوی نے فرمائی اور مہمان خصوصی کی حیثیت سے نائب ناظم جامعہ مولانا طلحہ صاحب ندوی اور مولانا اسحاق صاحب ندوی موجود تھے۔
پروگرام میں طلبہ نے حمد، نعت اور نظموں سمیت دلچسپ مکالمے بھی پیش کئے
صدارتی خطاب کرتے ہوئے مولانا مقبول احمد صاحب ندوی نے قرآن و حدیث کی روشنی میں والدین کی ذمہ داریوں پر روشنی ڈالی انہوں نے سرپرستوں سے اپیل کی کہ وہ اپنے بچوں اور بچیوں کو دینی تعلیم سے روشناس کرائیں اور دنیوی اور اخروی کامیابی حاصل کریں۔
مسابقہ میں اول اور دوم آنے والی ٹیموں کو نقد انعامات، ٹرافی اور سرٹیفکٹ سے نوازا گیا، اور تمام شریک ہونے والی ٹیموں کے درمیان سرٹیفکٹ کے ساتھ انعامات بھی تقسیم کیے گئے۔
صدر جلسہ کی دعا پر ٹھیک ساڑھے بارہ بجے یہ مسابقہ اختتام کو پہنچا۔