مدھیہ پردیش بلدیہ انتخابات: 25 سیٹوں پرہی بی جے پی کوکرناپڑااکتفا،سابقہ انتخابات سے 2سیٹیں کم ملیں
کانگریس نے 15 سیٹوں پر کامیابی حاصل کی،پچھلی بارصرف 7سیٹیں ملی تھیں،دونوں نے منایاجشن
بھوپال،16اگست(ایس او نیوز؍آئی این ایس انڈیا) مدھیہ پردیش کے 43 شہری بلدیاتی انتخابات کے نتائج نے بی جے پی کو جھٹکا دیا ہے۔ بی جے پی نے 25 سیٹوں پر قبضہ کیا ہے مگر پارٹی کو پچھلی بار کے مقابلے دو سیٹیں کم ملی ہیں۔ وہیں کانگریس نے 15 سیٹوں پر کامیابی حاصل کی ہے، کانگریس کے لیے یہ جیت بڑی ہے کیونکہ پچھلی بار اس کے پاس سات نشستیں تھیں، کانگریس نے بھی بی جے پی کی کئی سیٹوں پر نقب لگائی ہے۔
چھندواڑہ اور جھابوا ضلع میں بی جے پی کو کراری شکست ملی ہے، صوبے کی بڑی نگر پنچایت پر کانگریس نے جیت کے پرچم گاڑے ہیں تو کئی مقامات پر کانگریس کی ہار کا فرق بھی کم رہا، آزاد امیدواروں نے بھی تین سیٹوں پر قبضہ کیا ہے۔ ادھر بی جے پی اور کانگریس دونوں نے جیت پر اپنا دعوی کیا ہے۔نتائج کی خبر ملتے ہی بی جے پی ریاستی صدر نندکمار سنگھ چوہان، وزیر اعلی شیوراج سنگھ چوہان سمیت تمام بڑے لیڈر بھوپال کے بی جے پی دفتر پہنچے اور جشن منایا۔ کانگریس نے بھی جشن منانے میں کمی نہیں کی،پارٹی دفتر پر آتش بازی گئی۔اس الیکشن میں حکمراں پارٹی بی جے پی اور اپوزیشن پارٹی کانگریس آمنے سامنے تھی اور اسے کافی اہمیت دی جا رہی تھی۔ آپ کو بتا دیں کہ 43 شہری باڈی کے لئے 11 اگست کو ووٹ ڈالے گئے تھے، جس میں تقریبا آٹھ لاکھ ووٹروں نے اپنے حق رائے دہی کا استعمال کیا تھا۔