منگلورو 9؍فروری (ایس اونیوز)کانگریسی لیڈر جناردھن پجاری نے اپنی سوانح حیات میں سابق وزیر اعلیٰ ایس بنگارپّا کے خلاف جو منفی تبصرہ کیا ہے اس پر سورب سے جنتادل ایم ایل اے اوربنگارپّا کے بیٹے مدھو بنگارپّانے ردعمل ظاہر کرتے ہوئے کہا کہ جناردھن پجاری دراصل کانگریس کے نہیں بلکہ آر ایس ایس کے آدمی ہیں اسی لیے انہوں نے اپنی نفرت انگیز تقریروں کے لئے بدنام کلاڈکا پربھا کر کو کتاب کی رسم اجراء میں مدعو کیا تھا۔

مدھونے الزام لگاتے ہوئے کہا کہ جنوبی کینرا ضلع میں فرقہ وارانہ بدامنی پھیلانے میں پجاری کی سیاست کا بڑا ہاتھ ہے۔پجاری نے اپنی برادری کے لئے نہ کوئی اچھا کام کیا ہے اور نہ ہی اس کمیونٹی سے کوئی نیا لیڈر پیدا کیا ہے۔پجاری نے خود اپنی برادری کے لوگوں اور نوجوانوں کے ساتھ ہونے والی کسی بھی ناانصافی کے خلاف کبھی آواز نہیں اٹھائی ہے۔کلاڈکا پربھا کرکے خطابات سے ہونے والے فسادات میں ہلاک ہونے والے اپنی بیلّوا کمیونٹی کے نوجوانوں کے لئے ان کی آنکھوں میں کبھی آنسو نہیں آئے اور نہ ہی انہوں نے جیلوں میں سڑ رہے اپنی قوم کے نوجوانوں کی کوئی خبر لی۔مدھو کے بیان کے مطابق جناردھن پجاری کی آپ بیتی محض جھوٹ اور ان کے گناہوں کاپلندہ ہے، جو لائق مذمت ہے۔

مدھو بنگارپا نے آئندہ الیکشن میں زیادہ سے زیادہ حاصل کرنے کی امید جتاتے ہوئے کہا کہ بہو جن سماج وادی پارٹی کے ساتھ 20سیٹوں پر سمجھوتہ ہوا ہے جبکہ سی پی آئی اور سی پی آئی ایم کے ساتھ بھی سمجھوتے کی کوشش ہورہی ہے۔