لکھنؤ:8/جنوری (ایس او نیوز/آئی این ایس انڈیا)تر پردیش میں ہونے والے بورڈ امتحانات کے پیش نظر حکومت نے منگل کو کہا کہ نقل مافیاؤں کے خلاف قومی سلامتی ایکٹ کے تحت کارروائی کی جائے گی۔ یوپی بورڈ کے امتحانات سات فروری سے شروع ہوکر 16 دن تک ہوں گے۔ نائب وزیر اعلی دنیش شرما نے کہا کہ بغیر نقل کے امتحان کرانا ہمارا عزم ہے، نقل سے بچوں کا مستقبل برباد ہوتا ہے، جسے ہم کسی بھی قیمت پر برداشت نہیں کریں گے۔ بورڈ امتحانات کے دوران نقل کرانے والے گروہ کے خلاف ہم سخت کارروائی کریں گے۔ جو بھی لوگ نقل کرنے اور سوال نامہ لیک کرنے کے جرم میں شامل ہوں گے ہم ان کے خلاف قومی سلامتی ایکٹ کے تحت کارروائی کرنے میں بھی نہیں دریغ نہ کریں گے۔واضح ہو کہ دنیش شرما کے پاس ثانوی اور اعلی تعلیمی محکمہ بھی ہے ۔انہوں نے کہا کہ جو امتحان مرکز سابق میں نقل کروانے کے لیے بدنام ہے ان پر کڑی نظر رکھی جائے گی۔ انہوں نے کہا کہ نقل پر روک لگا کر یوپی حکومت کا مقصد تعلیمی سطح کو سدھارنا ہے۔ صوبہ کی یوگی حکومت امتحانات میں نقل روکنے کیلئے نئے اقدامات کر رہی ہے۔نائب وزیر اعلی شرما نے دعویٰ کیا کہ یوپی میں بی جے پی کے آنے سے پہلے جو ماحول تھا اس کے بارے میں نریندر مودی نے کہا تھا کہ یوپی میں نقل کے ٹینڈر ہوتے ہیں۔ بی جے پی کے اقتدار میں آنے کے بعد نقل پر روک لگانے کے لئے کئی خصوصی اقدامات کئے گئے ہیں ۔