بھٹکل 5/مارچ (ایس او نیوز) یہاں نوائط کالونی انفال سوپر مارکٹ کے قریب لاری اور بائک کے درمیان ہوئی ٹکر میں بائک سوار کی موقع پر ہی موت واقع ہوگئی جسکی شناخت  نرسمہا موگیر (37) کی حیثیت سے کی گئی ہے۔ حادثہ  منگل دوپہر قریب تین بجے پیش آیا۔

اطلاع کے مطابق بھٹکل بیلنی کا رہنے والا نرسمہا شرالی سے بھٹکل آرہا تھا کہ اس دوران نوائط کالونی میں ہائی وے کنارے  کھڑی ایک لاری باہر نکلنے کی فراغ میں دیکھ کر اچانک نرسمہا نے اپنی بائک  دائیں طرف لے جانے کی کوشش کی کہ مخالف سمت سے آرہی ایک تیز رفتار لاری سے ٹکراگیا۔ ٹکر لگتے ہی نرسمہا بیچ ہائی وے پر گرگیا اور سر کو شدید چوٹ لگنے سے اس کی موقع پر ہی موت واقع ہوگئی۔ حادثے کے بعد سڑک پر کافی  مقدار میں خون بہہ گیا  تھا۔

حادثے کے فوری بعد کثیر تعداد میں لوگ جمع ہوگئے،  ہائی وے پر کچھ دیر کے لئے ٹریفک نظام بھی متاثر رہا، بعد میں پولس نے مقامی لوگوں کی مدد سے نعش کو پوسٹ مارٹم کے لئے سرکاری اسپتال پہنچایا۔

شادی شدہ نرسمہا کے تعلق سے بتایا گیا ہے کہ وہ ماہی گیری کا کام کرتا تھا،  اس کی اکلوتی لڑکی کا گذشتہ سال ہی انتقال ہوا تھا اور آج اس کی برسی تھی۔

ٹاون پولس تھانہ میں معاملہ درج کیا گیا ہے اور پولس مزید چھان بین کررہی ہے۔