لوک سبھا کے سیکرٹری جنرل کی مدت کا رمیں ایک سال کا مزید اضافہ
نئی دہلی:8/نومبر(ایس او نیوز/آئی این ایس انڈیا)لوک سبھا اسپیکر سمترا مہاجن نے لوک سبھا کی پہلی خاتون سیکرٹری جنرل اسنیہ لتا شریواستو کی مدت میں ایک سال کے لئے توسیع کر دی ہے۔ مدھیہ پردیش کیڈر کی 1982 بیچ کی ریٹائرڈ آئی اے ایس افسر اسنیہ لتا شریواستو کو گزشتہ سال اس عہدے پر مقرر کیا گیا تھا اور ان کا درجہ کابینہ سکریٹری کا تھا۔ ان کی مدت کار 30 نومبر کو پورا ہونے والی تھی ۔ لوک سبھا سکریٹریٹ کی ایک نوٹیفکیشن کے مطابق لوک سبھا اسپیکر نے شریواستو کی مدت میں ایک سال کے لئے توسیع کر دی ہے جو ایک دسمبر 2018 سے 30 نومبر 2019 تک کے لئے مؤثر ہوگی اوران کا درجہ کابینہ سکریٹری کا ہوگا۔شریواستو کو 35 سال کا انتظامی تجربہ ہے اور انہوں نے مدھیہ پردیش حکومت کے ساتھ ساتھ مرکز میں کئی اہم عہدوں پر کام کیا ہے۔ انہوں نے وزارت قانون و انصاف میں سیکرٹری اور وزارت خزانہ میں خصوصی / اضافی سیکرٹری کے طور پر کام کیا ہے ۔ انہوں نے مدھیہ پردیش حکومت میں بھی پرنسپل سکریٹری سمیت کئی اعلی عہدوں پر کام کیا ہے۔