اُڈپی ،14؍ مارچ (ایس او نیوز ) ماہی گیروں کے 7 خاندانوں نے اپنے رشتہ داروں کے لاپتہ ہونے کے 88دن کے باجود ان کا اتہ پتہ چلانے میں سرکاری ایجنسیوں کی ناکامی کے خلاف اُڈپی ۔چکمگلور کی نشست پر 18؍ اپریل کو ہونے والے لوک سبھا انتخابات کے بائیکاٹ کا فیصلہ کیا ہے ۔

یاد رہے کہ یہ سانحہ اس وقت پیش آیا تھا جب گذشتہ سال دسمبر میں ملپے بندر گاہ سے یہ ماہی گیر گہرے سمندر میں مچھلیوں کے شکار پر گئے تھے ۔ ان کے ارکان خاندان نے دکھ کا اظہار کرتے ہوئے اعلان کیا کہ جب حکومت ان کے افراد خاندان کا پتہ چلانے میں ناکام رہی تو پھر وہ کس طرح ووٹ دے سکتے ہیں کیوں کہ وہ شدید دکھ کا شکار ہیں۔

اس واقعہ کے منظر عام پر آنے کے بعد بیشتر ایجنسیوں بشمول بحریہ ’ کوسٹ گارڈ کو چوکس کیا گیا تھا اور ان کی تلاش شروع کی گئی تھی جو ناکام ہوگئی تھی ۔ ماہی گیروں کی تنظیم نے وزیر دفاع نرملا سیتا رامن سے بھی ملاقات کرتے ہوئے اس معاملہ میں مداخلت کرنے کی خواہش کی تھی تا کہ لاپتہ ماہی گیروں کی تلاش کی جاسکے تاہم آج کی تاریخ تک ان لاپتہ ماہی گیروں کا پتہ چلانے میں ناکامی ہوئی ہے۔ یہاں تک کہ دفاعی یونٹس کی بھی خدمات حاصل کی گئی تھی لیکن اس میں ناکامی ہوئی۔