کسانوں کے قرضہ جات معاف کرنے کا فیصلہ خوش آئند: کمار سوامی
بنگلورو،21؍جون(ایس اونیوز)سابق وزیر اعلیٰ اور ریاستی جنتادل (ایس) صدر ایچ ڈی کمار سوامی نے وزیر اعلیٰ سدرامیا کی طرف سے کسانوں کے قرضہ جات معاف کرنے کے اعلان کا خیر مقدم کیا ۔ بلگاوی کے اتھنی میں اخباری نمائندوں سے بات چیت کرتے ہوئے انہوں نے کہاکہ ریاستی حکومت کی طرف سے 50 ہزار روپیوں تک کے قرضہ معاف کرنے کا جو فیصلہ کیا گیا ہے اس سے صرف چند ہی کسانوں کو فائدہ ہوگا۔ بیشتر کسانوں نے ایک لاکھ سے دو لاکھ روپیوں تک کا قرضہ لیا ہے۔اسی لئے وزیر اعلیٰ کو قرضہ معاف کرنے کی اس حد کو بڑھانا چاہئے۔ انہوں نے کہاکہ مرکزی حکومت نے اگر قومی بینکوں سے لئے گئے قرضہ جات معاف کرنے کی پہل کی تو اس سے 80 فیصد کسانوں کو فائدہ ہوگا۔ کوآپریٹیو بینکوں کی طرز پر اب مرکز کو بھی فیصلہ کن قدم اٹھانا چاہئے۔ کمار سوامی نے کہاکہ خود ریزرو بینک آف انڈیا کے گورنر نے کسانوں کے قرضہ جات معاف کرنے کی مخالفت کرتے ہوئے کہا ہے کہ تجارتی بینکوں نے اگر کسانوں کے قرضہ جات معاف کردئے تو ملک کا بینکنگ نظام دیوالیہ ہوجائے گا۔ کمار سوامی نے کہاکہ اس طرح کے بیانات دینے والے لوگوں کو ملک بدر کردیا جانا چاہئے۔