علیحدہ لنگایت مذہب کے لئے تحریک عام انتخابات کے بعد: ایم بی پاٹل
بنگلورو،16؍دسمبر(ایس او نیوز) سابق وزیراور لنگایت طبقے کو الگ مذہب کا درجہ دینے کی تحریک سے جڑے لیڈر ایم بی پاٹل نے کہا ہے کہ لوک سبھا انتخابات کے بعد لنگایت طبقے کو الگ طبقے کے درجے کی مانگ کو لے کر فیصلہ کن جدوجہد شروع کی جائے گی۔
انہوں نے کہاکہ ریاستی حکومت کی طرف سے لنگایت طبقے کو الگ مذہب کا درجہ دے کر اسے اقلیت قرار دینے کے لئے ریاستی حکومت کی طرف سے کی گئی سفارش کو مرکزی حکومت نے مسترد کرکے اچھانہیں کیا ہے۔ اخباری نمائندوں سے بات چیت کرتے ہوئے انہوں نے کہاکہ اب اگر اس معاملے کو لے کر تحریک چلائی گئی تو اسے سیاسی رنگ میں رنگنے کی کوشش کی جائے گی ، اسی لئے عام انتخابات کے بعد فیصلہ کن تحریک چلانے کا عزم کیا گیا ہے۔
مرکزی حکومت کے فیصلے پر اعتراض کرتے ہوئے انہوں نے کہاکہ سابق وزیر اعلیٰ سدرامیا نے لنگایت طبقے کو اس کا حق دلانے جو فیصلہ لیاتھا میڈیا نے اسے غلط رنگ سے پیش کرکے عوام میں انتشار پیدا کرنے کی کوشش کی۔ ریاستی کابینہ میں توسیع کے متعلق ایم بی پاٹل نے کہاکہ 22دسمبر کو کابینہ میں توسیع کا علان کیا گیا ہے، انہیں توقع ہے کہ اس مرحلے میں شمالی کرناٹک سے جو ناانصافی ہوئی ہے اسے دور کیا جائے گا۔
ایم بی پاٹل نے کہاکہ انہوں نے کہاکہ اس سلسلے میں صدر کانگریس راہل گاندھی کے سامنے حقائق رکھے گئے ہیں۔ ریاست کی مخلوط حکومت کے مستقبل کے بارے میں تمام قیاس آرائیوں کو مسترد کرتے ہوئے ایم بی پاٹل نے کہاکہ مخلوط حکومت اپنے پانچ سال مکمل کرے گی اس میں کوئی رخنہ اندازی نہیں کی جائے گی۔