ساحلی کینرا میں کچھ لمحوں کے لئے بادلوں کی گرج کے ساتھ بارش؛ کمٹہ میں بجلی گرنے سے ایک مکان منہدم؛ تین شدید زخمی
کمٹہ 25/مئی (ایس او نیوز) کل شام کو کچھ دیر کے لئے ہوئی بادلوں کی گرج کے درمیان زوردار بارش سے ساحلی کینرا میں گرمی کا زور ٹوٹ گیا ہے اور لوگوں نے گرمی سے نجات ملنے پر راحت کی سانس لی ہے، البتہ کمٹہ تعلقہ کے برگی دیہات میں بجلی گرنے سے ایک مکان کو شدید نقصان پہنچا ہے اور دیواریں گرنے سے گھر کے اندر موجود ایک ہی خاندان کے تین لوگوں کو شدید چوٹیں آئی ہیں۔
ذرائع سے ملی اطلاع کے مطابق کل جمعرات کی شام یہ تینوں رات کا کھانا ختم کرکے آرام کرنے کی تیاری میں تھے کہ بادلوں کی گرجدار آوازوں کے ساتھ بجلی گرنی شروع ہوگئی، ساتھ ساتھ کچھ لمحوں کے لئے زوردار بارش بھی شروع ہوگئی، ایسے میں ایک خطرناک بجلی کوندی جو سیدھے ان کے مکان کو چھوگئی اور پل بھر میں ان کے مکان کی ایک دیوار گرگئی، دیوار گرتے ہی چھت کا حصہ بھی ٹوٹ گیا ، جس کی زد میں آکر گھر پر موجود تینوں لوگ زخمی ہوگئے۔
زخمیوں کی شناخت دیورائے پٹگار، ان کی اہلیہ لکشمی پٹگار اور ان کی لڑکی ہیما پٹگار کی حیثیت سے کی گئی ہے۔
حادثے کے فوری بعد پڑوسیوں نے تینوں کی مدد کرتے ہوئے انہیں مقامی سرکاری اسپتال پہنچایا، جہاں ان کو ضروری طبی امداد فراہم کی گئی ہے۔
