بنگلورو،10 ؍ستمبر (ایس او نیوز) بھارتیہ جنتاپارٹی نے بروز ہفتہ اس سے انکار کیا کہ پارٹی کے ریاستی صدر بی ایس اڈی یو رپا نے کبھی محکمہ انکم ٹیکس کے سربراہ کو خط لکھ کر ڈی کے شیو کما رکی ٹیکس چوری کے تعلق سے تحقیق کرنے کہا ہو جیسا کہ ہفتہ کو ان کے بھائی ،رکن پارلیمان نے الزام لگا یا ہے۔ایک جعلی خط جاری کرنے کے لیے بی جے پی کے جنرل سکریٹری این روی کمار نے سریش کو لتاڑا اور فرق دکھانے کے لیے ایڈی یورپا کی جانب سے لکھاگیا ایک اور خط دکھایا۔ایڈی یورپا نے بھی محکمہ انکم ٹیکس کو شیو کمار کے خلا ف خط لکھے جانے سے انکار کیا۔انہوں نے کہا کہ آج ڈی کے سریش نے یہ الزام لگایا ہے کہ میں نے ان کے بھائی کی بد عنوانیوں کے تعلق سے تحقیق کرنے محکمہ انکم ٹیکس کے سربراہ کو جنوری 2017میں خط لکھا ہے۔ لیکن میرے ڈی کے شیوکمار کے ساتھ ہمیشہ سے اچھے تعلقات رہے ہیں۔ ہم نے ایک دوسرے پر کبھی تنقید نہیں کی۔پھر کس لیے ان کے خلاف محکمہ انکم ٹیکس کو خط لکھوں؟ سریش اس معاملے میں الجھن پیدا کرنے کی کوشش کر رہے ہیں۔وہ خط جعلی ہے۔ بی جے پی کے ذرائع نے کہا کہ یہ خط چن پٹن کے سابق رکن اسمبلی سی پی یوگیشور نے ایڈی یورپاکے نام سے لکھ کر ڈی کے شیوکمار اور ان کے بھائی سریش کو محکمہ انکم ٹیکس کے ساتھ الجھانا چاہا ہوگا۔انہوں نے دعویٰ کیا کہ یہ خط صاف طور پر جعلی ہے اس لیے کہ ایڈی یورپا کا دستخط دا ئیں جانب ہے جبکہ دوسرے خط میں یہ بائیں جانب ہے۔ای میل آئی ڈی اور ایڈی یورپا کے دفتر کا پتہ بھی جعلی ہے۔بی جے پی کے ریاستی صدر بی ایس ایڈی یورپانے بعدازاں ایک ٹوئیٹ کر کے کہا کہ’’جعلی خط جو ڈی کے برادران کے خلاف میری جانب سے لکھے جانے کی بات کی جار ہی ہے وہ اس کے ناپاک اتحاد کو بچانے کانگریس کی مایوسی کا مظہر ہے۔میں ایسی سستی سیاست میں کبھی ملوث نہیں ہوا ، اگر یہ ثابت ہوگیا تو میں سیاست سے سبکدوش ہوجاؤں گا۔