ہمیں اپنی چھٹیوں سے لطف اندوزہونے دیجئے : جسٹس سیکری
نئی دہلی19 مئی (ایس او نیوز؍ آئی این ایس انڈیا) کرناٹک میں اقتدار کو لے کر تنازعہ پر سماعت مکمل کرتے ہوئے سپریم کورٹ نے آج کہا کہ اب ہمیں اپنی چھٹیوں سے لطف اندوز ہونے دیجئے۔ عدالت عظمیٰ میں تین ججوں کے ایک بنچ کی صدارت کر رہے جسٹس اے کے سیکری نے جب عجیب انداز میں یہ تبصرہ کیا اس وقت عدالتی کمرہ قہقہوں سے گونج اٹھا۔ کانگریس نے تین بار رکن اسمبلی منتخب جا چکے کے جی بوپیا (بی جے پی) کو کرناٹک اسمبلی کا عارضی صدر مقرر کئے جانے کے بعد عدالت کا رخ کیا تھا۔ تاہم روایتی طور پر عارضی صدر ایوان کی سب سے طویل رکن رہنے والا شخص ہوتا ہے ۔ عدالت میں آج کی سماعت شروع ہونے پر سینئر وکیل کپل سبل نے ہفتہ کو پریشان کرنے کو لے کر بنچ سے معافی مانگی کیونکہ یہ چھٹی کا دن ہوتا ہے۔ اپنے فرائض منصبی کو لے کر جانے جانے والے جسٹس سیکری نے کہا کہ ہمیں اپنا آئینی فرض نبھانا ہے۔ اس پر سبل نے کہا کہ ہم آپ کو کبھی پریشان نہیں کرتے لیکن اس کے سوا ہمارے پاس کوئی چارہ نہیں تھا ۔ عدالت نے جب اپنا حکم سنانا شروع کیا۔ تب کانگریس جے ڈی ایس کی جانب سے مشترکہ طور پر پیش ہوئے سینئر وکیل ابھیشیک منو سنگھوی نے بنچ سے ہلکے پھلکے انداز میں کہا کہ ہمیں امید ہے کہ ہم آپ کو (ججوں کو ) اتوار کو پریشان نہیں کریں گے۔ اس پر جسٹس سیکری نے فورا کہا کہ ہم بھی اسی کی بحث کر رہے ہیں ، ہمیں بھی یہی خدشہ ہے ۔