یلاپور:19؍ڈسمبر (ایس او نیوز) بنگلورو فاریسٹ محکمہ کے سی آئی ڈی دستہ کے افسران نے چیتے کے چمڑوں کی سپلائی کرنے والے  تین ملزموں کوچمڑے سمیت شہر کے منجوناتھ نگر کے قریب  گرفتار کرلیا ہے جن کی شناخت  کمار یلاپور، آنگوڈو کے گروپرساد بھٹ اور میسور کے رتیک کی حیثیت سے کی گئی ہے۔

بتایا گیا ہے کہ ملزمان چیتے کا شکار کرنے کے بعد چمڑوں کو دو بائک کے ذریعے سپلائی کررہے تھے ۔ چیتے کے چمڑوں کے فروخت کرنے والے  جال میں گرفتار رتیک کے ساتھ یلاپور کے کمار یلاپور اور گروپرساد بھٹ کے تعلقات تھے اور سپلائی کرنےمیں ایک دوسرے کا تعاون کیا کرتے تھے۔ رتیک جب میسور میں گرفتار ہوا تھا تو جال میں ملوث افراد کے  نام سامنے آئے  جس میں ان دونوں کا بھی نام شامل تھا۔ جس کے بعد بنگلورو محکمہ فاریسٹ کے افسران نے چھاپہ مار کر ملزمان سمیت چمڑوں کو ضبط کرنے  میں کامیابی حاصل کی ۔

گروپرساد بھٹ نامی ملزم ضلع کے مشہور تعلیمی ادارے ٹی ایس ایس یلاپور کی شاخ کا ملازم ہے۔ بتایا جارہاہے کہ گروپرساد پچھلے کئی برسوں سے اس دھندے میں ملوث ہے۔کارروائی میں  فاریسٹ محکمہ کے سی آئی ڈی دستہ کے ڈی وائی ایس پی ، ایس ایس کاشی ، پی ایس آئی ایم ایس رام مورتی کی رہنمائی میں ہیم کمار، ہریش  ، پرمیش وغیرہ شریک تھے۔