ممتاز قو می رہنماقمرالاسلام کا جسد خاکی مکمل سرکاری اعزاز کیساتھ سپرد لحد،وزیر اعلیٰ سدرامیا، اورکئی کابینی وزراآخری دیدار کرنے والوں میں شامل
گلبرگہ،20ستمبر(ایس او نیوز؍سرفراز مرزا بیگ)ممتاز قومی رہنما الحاج قمرالاسلام کو 19ستمبر کی رات مکمل سرکاری اعزاز کے ساتھ سپرد لحد کیا گیا۔کے سی ٹی گراؤنڈ میں تقدس مآب الحاج ڈاکٹر سید شاہ گیسودراز خسرو حسینی صاحب قبلہ سجادہ نشین بارگاہ بندہ نوازؒ نے مرحوم قمرالاسلام کی نماز جنازہ پڑھائی اور دعائے مغفرت فرمائی۔کل دوپہر قریب 12بجے بنگلور کے ایک خانگی اسپتال میں قلب پر ہوئے شدید حملہ کے بعد ان کا انتقال ہوگیا تھا۔شام5بجے اسپتال سے ان کا جسد خاکی ان کی رہائش گاہ آرٹی نگر لے جایا گیا جہاں سے کے پی سی سی دفتر لے جایا گیا۔ ان کے جسد خاکی کو عام دیدار کے لئے عیدگاہ قدوس صاحب بنگلور میں رکھا گیا تھا۔ بنگلور سے بذریعہ خصوصی ایمبولینس ویان الحاج قمرالاسلام صاحب کا جسد خاکی آج صبح7بجے گلبرگہ لایا گیا۔مرحوم قائد الحاج قمرالاسلام کی میت کو ان کی رہائش گاہ کے عقب میں واقع انہی کے قائم کردہ نوبل اسکول میں تجہیز و تکفین کرنے کے بعد میت زبردست جلوس کے ساتھ خصوصی ایمبولینس ویان میں کے سی ٹی گراؤنڈ لائی گئی۔ جلوس جیورگی سرکل، سنٹرل بس اسٹانڈ، ایم ایس کے ملز، جیلان آباد، مصباح چوک،رنگ روڈ، الند ناکہ، تاج سلطانپور سرکل، کاکڑے چوک، ہمناآباد سرکل سے ہوتا ہوا کے سی ٹی گراؤنڈ پہنچا۔ کے سی ٹی گراؤنڈ میں مرحوم قائد الحاج قمرالاسلام کے جسد خاکی کو زائد از 6گھنٹوں تک عوامی دیدار کے لئے رکھا گیا۔ کے سی ٹی گراؤنڈ میں مرحوم قائد الحاج قمرالاسلام صاحب کا آخری دیدار کرنے کیلئے بلالحاظ مذہب وملت مردوخواتین عوام کا زبردست جم غفیر دیکھا گیا۔ نہ صرف گلبرگہ شہر بلکہ گلبرگہ ضلع کے تعلقہ جات ، علاقہ حیدرآباد کرناٹک کے اضلاع بیدر، یادگیر ، رائچور کے علاوہ بیجاپور سے محبان قمرالاسلام کی کثیر تعداد اپنے محبوب قائد کے جسد خاکی کا آخری دیدار کرنے کیلئے پہنچی۔چیف منسٹر سدرامیا نے اپنے کابینی رفقاء آر روشن بیگ، تنویر سیٹھ،یو ٹی قادر، ایم بی پاٹل، ڈاکٹر شرن پرکاش پاٹل، پریانک کھر گے، ایشور کھنڈرے ،کے سی وینوگوپال انچارج تنظیمی امور کرناٹک،کے پی سی سی صدر ڈاکٹر جی پرمیشور، لوک سبھا میں کانگریس پارلیمانی پارٹی کے لیڈر ملیکارجن کھر گے کے ہمراہ پہنچ کر اپنے کابینی رفیق رہے مرحوم الحاج قمرالاسلام صاحب کے جسد خاکی کا آخری دیدار کیا اور انہیں خراج عقیدت پیش کیا۔چیف منسٹر سدرامیا کی موجودگی میں ضلع پولیس نے الحاج قمرالاسلام کے جسد خاکی کو گارڈ آف آنر پیش کیا۔ اس موقع پر ریجنل کمشنر گلبرگہ ہرش گپتا، آئی جی پی آلوک کمار، ڈپٹی کمشنر گلبرگہ آر وینکٹیش کمار موجود تھے۔ڈاکٹر اومیش جادھو، رحیم خان ، دتاتریاپاٹل ریور، کے بی شانپا ، الحاج اقبال احمد سرڈگی ارکان اسمبلی و کونسل، بابوراؤ چنچنسور، الم پربھو پاٹل، سشیل نموشی سابق ایم ایل سی ،بی جی جولی سابق ایم پی ، سید احمد پاشاہ قادری مجلسی رکن اسمبلی چارمینار حیدرآباد،پیرزادہ بشیر نقشبندی صدر کل ہند انجمن پیشوایان مذاہب، حضرت سید شاہ ہدایت اللہ قادری سجادہ نشین عملی محلہ گلبرگہ ،حضرت سید شاہ حیدر پاشاہ قادری سجادہ نشین نیلنگہ شریف، مولانا سید عبدالرشید ، مےئرگلبرگہ شرن کمار مودی، عالم خان چیرمین ٹورازم کارپوریشن ، الیاس سیٹھ باغبان چیرمین این ای کے آر ٹی سی ، شیخ شاہ محمد قوام الدین جنیدی ایڈوکیٹ وہاج بابا صدر مجلس اتحاد المسلمین کے علاوہ مختلف سیاسی عوامی قائدین، عمائدین و علماء ، تعلیمی اداروں کے ذمہ داران نے کثیر تعداد میں شرکت کی۔ فرازالاسلام فرزند مرحوم الحاج قمرالاسلام ، انورالحق موتی سیٹھ برادراکبر مرحوم الحاج قمرالاسلام ، نجم الاسلام احمر،ڈاکٹر محمد اصغرچلبل، الحاج قمرالاسلام صاحب کے جسد خاکی سے نزد موجود تھے۔آج کئی دینی مدارس میں الحاج قمرالاسلام کی مغفرت کے لئے قرآن خوانی کی گئی۔ کے سی ٹی گراؤنڈ میں بھی قرآن خوانی کا اہتمام کیا گیا تھا۔ نماز عصر کی ادائیگی کے بعد جلوس جنازہ کی روانگی عمل میں آئی۔ جلوس جنازہ قمرالاسلام کا لونی ، خواجہ کالونی، کالاہوڑا، مسجد چوک، مسجد مقبرہ ، مسلم چوک ،قبرستان قلندرخان پہنچا جہاں الحاج قمرالاسلام کے جسد خاکی کو سپرد لحد کیا گیا۔
