بنگلورو27فروری(ایس او  نیوز)تحویل اراضی ترمیمی بل 2019کو واپس لینے ۔ کسانوں کیلئے یو پی اے حکومت کے مسودہ کے تحت معاوضہ جاری کرنے سمیت دیگر مانگوں کوریاستی حکومت سے فوری پورا کرنے کاکرناٹک اسٹیٹ رعیت جاگروتی ہتا رکھشنا ویدیکے نے مطالبہ کیا ۔ ویدیکے کے اعزازی صدر ناگراجو نے اخباری کانفرنس کے دوران بتایا کہ سرکاری پراجکٹوں کیلئے تحویل میں لی گئی اراضی کے بدلے کسانوں کو نہ تو کوئی معاوضہ دیا جارہا ہے اورنہ ہی انہیں متبادل زمین دی جارہی ہے ۔ انہوں نے کہا کہ تحویل اراضی ترمیمی بل 2019سے کسانوں کو فائدہ پہنچنے کی بجائے نقصان پہنچے گا۔ انہوں نے کہا کہ کسانوں کی زمینوں پرقبضہ کرتے ہوئے انہیں کنگال بنایا جارہا ہے ۔ صرف شہرت کیلئے وزیراعلیٰ ایچ ڈی کمار سوامی کسانوں کے ساتھ ہمدردی کرنے لگے ہیں ۔ انہوں نے کہا کہ کسانوں کے نام پرسیاست کی جارہی ہے۔ تحویل اراضی ترمیمی بل کو وزیر اعلیٰ نے جاری کرنے کا جو فیصلہ کیا ہے وہ سراسر غلط ہے ۔ کہا کہ وزیر اعلیٰ اس اقدام سے رئیل اسٹیٹ ایجنٹ اور اس سے جڑے افراد کو فائدہ پہنچایا جارہا ہے ۔ انہوں نے بتایا کہ آنیکل تعلقہ کے سوریا نگر فورتھ اسٹیج کیلئے 2019کے دوران کسانوں کی زمینوں پر قبضہ کیا گیا تھا ۔ لیکن زمین کھونے والے کسانوں کو اب تک معاوضہ جاری نہیں ہوپایا ہے۔ انہوں نے حکومت سے مطالبہ کیا کہ وہ موجودہ مارکیٹ کے تحت کسانوں کو معاوضہ جاری کریں۔ انہوں نے حکومت سے مطالبہ کیا کہ وہ ویدیکے کی مانگوں کو جلداز جلد پورا کریں۔