پی ایم اے ایل کیس:لالو پرساد کے دوسرے داماد راہل کو جاری کیا گیا سمن
نئی دہلی،16؍جنوری (ایس او نیوز؍آئی این ایس انڈیا)ای ڈی نے لالو پرساد کی بیٹی میسا بھارتی اور دیگر کے خلاف منی لانڈرنگ معاملے کی اپنی انکوائری کے سلسلے میں آر جے ڈی سربراہ کے ایک اور داماد راہل یادو کو سمن جاری کیا ہے۔ایجنسی کو مبینہ طور پر پتہ چلا ہے کہ راہل یادو نے لالو پرساد کی بیوی رابڑی دیوی کے اکاؤنٹ میں کچھ رقم منتقل کی تھی۔اس سے لالو پرساد کے خاندان پر بحران آگیاہے۔ایجنسی کے ذرائع نے بتایا کہ لالو پرساد کی چوتھی بیٹی راگنی کے شوہر راہل یادو کو کیس کے تفتیشی افسر کے سامنے اس ہفتے بعد میں اپنا بیان دینے اور تقریبا ایک کروڑ روپے کے منتقلی کے بارے میں معلومات دینے کے لئے سمن جاری کیا گیا ہے۔ایجنسی اس معاملے میں لالو پرساد کے ایک اور داماد اور میسا بھارتی کے شوہر شیلیش کمار سے بھی پہلے کئی بار پوچھ گچھ کر چکی ہے۔یہ معاملہ میسرس مشیل پیکرس اینڈ پرنٹر پرائیویٹ لمیٹڈ کمپنی کی طرف سے مبینہ منی لانڈرنگ سے متعلق ہے اور ایسا بتایا جا رہا ہے کہ اس معاملے کا تعلق میسا اور شیلیش سے ہے۔ڈائریکٹوریٹ منی لانڈرنگ روک تھام قانون (پی ایم ایل اے ) کی مجرمانہ دفعات کے تحت معاملے کی تحقیقات کر رہا ہے۔