چارہ گھوٹالہ سے جڑے ایک دیگر معاملے میں لالو پرساد قصوروار قرار، جگن ناتھ مشرا بری
رانچی ،19؍ مارچ ( ایس او نیوز؍آ ئی این ایس انڈیا) غیر منقسم بہار کے اربوں روپیے کے مشہور چارا گھوٹالہ سے متعلق چوتھے معاملہ میں آج مرکزی تفتیشی بیورو (سی بی آئی)کی خصوصی عدالت نے بہار کے سابق وزیر اعلی اور راشٹریہ جنتا دل (آر جے ڈی) کے صدر لالوپرساد یادو سمیت 19 ملزموں کو مجرم قرار دیا ہے، دوسری طرف سابق وزیر اعلی جگن ناتھ مشرا سمیت 12 افراد کو بری کر دیا۔ سی بی آئی کے خصوصی جج شیو پال سنگھ نے دمکا کے سرکاری خزانہ سے غیر قانونی طورپر رقم نکالنے کے معاملہ 38 اے ؍ 96 میں سماعت کے بعد یادو سمیت 19 ملزمان کو مجرم قرار دیا جبکہ سابق وزیر اعلی ڈاکٹر جگن ناتھ مشر اور پبلک اکاؤنٹس کمیٹی کے اس وقت کے صدردھروبھگت سمیت 12 ملزموں کو ثبوت نہ ہونے کی وجہ سے بری کر دیا۔ سزا پر بحث کے لئے عدالت نے 21، 22 اور 23 مارچ کی تاریخ مقرر کی ہے۔واضح رہے کہ دمکا میں مویشی پالن کے عہدیداروں، انتظامی افسروں اور سیاستدانوں کی ملی بھگت سے سپلائرز نے 96 فرضی واؤچر کے ذریعے دسمبر 1995 سے جنوری 1996 کے درمیان سرکاری خزانے سے 3 کروڑ 76 لاکھ کی غیر قانونی نکاسی کی تھی۔ یہ نکاسی ضلع کے گاووں اور قصبوں میں جانوروں کی خوراک کی اشیا، دوا اور زرعی سامان کی تقسیم کے نام پر کی گئی تھی جبکہ اس دوران فنڈز کی تقسیم کی زیادہ سے زیادہ حد محض ایک لاکھ 50 ہزار تھی.۔