پٹنہ، 24؍جولائی(ایس او نیوز؍آئی این ایس انڈیا)بہار کے ڈیزاسٹر مینجمنٹ وزیر چندر شیکھر نے مرکزی تفتیشی بیورو (سی بی آئی)کا موازنہ کتے سے کرنے کے بعد بہار کی سیاست گرم ہو گئی ہے۔ریاست میں اہم اپوزیشن پارٹی بھارتیہ جنتا پارٹی (بی جے پی)نے وزیر چندرشیکھر کو کابینہ سے برخاست کرنے کا مطالبہ کیا ہے۔نتیش حکومت کے وزیر پروفیسر چندرشیکھر نے اتوار کو آر جے ڈی کے کارکنوں کے ایک اجلاس میں کہا کہ آر جے ڈی صدر لالو جی سے پانچ گنا سے زیادہ جائیداد رکھنے والے یہاں ایک ہزار خاندان ہوں گے، لیکن کسی پر ڈنڈا نہیں چلے گا، کسی کے لئے انفورسمنٹ ڈائریکٹوریٹ (ای ڈی )نہیں ہے، کسی کے لئے سی بی آئی نہیں ہے،مگر لالو کے کل خاندان کو دفن دینے کے لئے ای ڈی بھی ہے اور سی بی آئی بھی ہے۔انہوں نے مزید کہا کہ بی جے پی کے لوگ متحدہ ترقی پسند اتحاد (یو پی اے)کے زمانے میں کہتے تھے کہ سی بی آئی تو حکومت کاطوطاہے،اب کیا ہو گیا انہیں؟ طوطے نہیں ابھی تو کتا جیسا حال نہیں ہے اس کا؟۔اس بیان کے بعد بی جے پی کے سینئر لیڈر اور اسمبلی میں حزب کے رہنما پریم کمار نے پیر کو کہا کہ کسی بھی ادارے پر ایسے بیان دینا مناسب نہیں ہے۔انہوں نے وزیر اعلی نتیش کمار سے ایسے بیان دینے والے وزیر کو فوری برطرف کرنے کا مطالبہ کرتے ہوئے کہا کہ ایسے بیان دینے والے لوگوں کو کابینہ میں نہیں رکھا جا سکتا۔