بنگلورو،19؍جنوری(ایس او نیوز) بنگلورو کے لال باغ میں میسور ہارٹی کلچر سوسائٹی کی جانب سے منعقد ہونے والے یوم جمہوریہ فلور شو کا ہزاروں افراد کی موجودگی میں دھرمستلا کے ڈاکٹر ویرندر ہیگڈے، آدھی چن چن گری مٹھ کے مٹھادیش نرمالندا ساومی جی کے ہاتھوں افتتاح عمل میں آیا۔
اس موقع پر میئر سمپت راج، ریاستی وزراء ، ایچ ایس ملیکارجن ایچ مہادیوپا سمیت دیگر اہم شخصیات موجود تھیں۔ یہ فلاور شو28؍ جنوری تک جاری رہے گا۔ ریاستی وزیر ایس ،ایس ملیکارجن نے کہا کہ ریاستی حکومت عالمی سطح پر شہرت یافتہ لال باغ اور کبن پارک کی حفاظت اور ان کی ترقی کی پابند ہے۔ انہوں نے کہا کہ شہر میں آلودگی بڑھنے لگی ہے۔ جس کی وجہ سے شہری کافی پریشان ہیں۔ اس کو مدنظر رکھ کر محکہ باغبانی مذکورہ دونوں مقبول ترین پارکوں کے تحفظ اور ان کی ترقی کے لئے اقدامات کررہاہے۔ انہوں نے کہا کہ یہ 207واں فلور شو ہے۔ انہوں نے شہریان سے گزارش کی کہ وہ اپنے مکانوں اور علاقوں میں شجرکاری کو بڑھاوادیں۔ اور مکانوں کے احاطے میں باغیچے بنانے میں اپنی دلچسپی دکھائیں تاکہ ماحولیات کی حفاظت کی جاسکے۔ انہوں نے بتایا کہ محکمہ نے لال باغ کو خوصبورت بنانے کے مقصود سے کئی نئے پودوں کو لگایاہے۔شیرمیسور حضرت ٹیپو سلطان شہید ؒ کے والد حضرت حیدر علی کے قائم کردہ لال باغ کو ہرسال یوم جمہوریہ اور یوم آزادی کے موقع پر رنگ برنگے پھول اور پودوں سے سجایاجاتا ہے۔ امسال پھولوں کے ساتھ باہوبلی کامجسمہ بھی نصب کیاگیاہے ۔