کویت نے 15 ہندوستانیوں کی موت کی سزا عمر قید میں تبدیل کی: حکومت
نئی دہلی6 اپریل(ایس او نیوز؍آئی این ایس انڈیا) کویت کے امیر نے 15 ہندوستانیوں کو ملی موت کی سزا عمر قید میں تبدیل کر دی ہے۔ حکومت نے لوک سبھا میں اس کی اطلاع دی ہے ۔ خارجہ وزیر مملکت وی کے سنگھ نے ایک سوال کے تحریری جواب میں کہاہے کہ دیگر 119 ہندوستانیوں کی سزا بھی امیر کے حکم سے کم کر دی گئی ہے ۔ ان کے بیان میں اس بارے میں اطلاع نہیں دی گئی ہے کہ یہ سزائیں کب بدلی گئیں اور نہ ہی قصورواروں کے بارے میں کوئی معلومات دی گئی ہے۔ 119 ہندوستانیوں میں سے 53 قصورواروں کی سزائے عمر قیدکوکم کرکے20 سال کر دی گئی۔22 ہندوستانیوں کو فوری طور پر رہا کر دیا گیا، جبکہ 18 قصورواروں کی سزا تین چوتھائی تک کم کر دی گئی۔ مجرم پائے گئے25ہندوستانیوں کی سزا آدھی کر دی گئی جبکہ ایک مجرم کی سزا کا چوتھا حصہ کم کر دیا گیا۔ سنگھ نے کل بتایا کہ حکومت ہند بیرون ملک میں اپنے مشن اور دوطرفہ کثیرالجہات مفاہمانہ طریقہ کار کے ذریعہ بیرون ملک جیلوں میں قید بھارتی شہریوں کے معاملات متعلقہ حکام کے سامنے مسلسل اٹھاتی رہی ہے ۔