کنداپور:نامعلوم گاڑی کی ٹکر سے ایک شخص ہلاک دوسرا شدید زخمی
کنداپور24؍فروری (ایس او نیوز) کنداپور کے مرونتے علاقے میں صبح کی اولین ساعتوں میں ایک نامعلوم گاڑی کی ٹکر سے ایک شخص ہلاک اور دوسرا شدید زخمی ہوگیا ہے۔
موصولہ رپورٹ کے مطابق صبح چہل قدمی کے لئے نکلے ہوئے کچھ لوگوں نے دیکھا کہ دو افراد زخمی حالت میں پڑے ہوئے ہیں۔ ان دونوں کوکنداپور کے نجی اسپتال میں پہنچانے کا انتظام کیا مگر وہاں پتہ چلا کہ ان زخمیوں میں سے ایک شخص کی موقع پر ہی موت واقع ہوچکی تھی جس کی شناخت ناوندا کے رہنے والے پربھاکر کے طور پر کی گئی ہے۔جبکہ دوسرے زخمی کا نام سریش ہے جسے شدید چوٹ لگی ہے۔کہاجاتا ہے کہ یہ دونوں افراد کنداپور کے ایک ہوٹل میں ملازم تھے۔اپنی ڈیوٹی ختم کرکے رات دو بجے کے قریب وہ بس کے ذریعے مرونتے تک پہنچے ۔ وہاں سے اپنے گھروں کی طرف وہ پیدل چلے جارہے تھے کہ ایک تیز رفتار کار انہیں ٹکر مارکر بغیر رکے آگے نکل گئی۔صبح چہل قدمی کرنے والوں کی آمد تک وہ گھنٹوں اسی جگہ پر پڑے رہے۔پولیس نے نامعلوم ڈرائیور کے خلاف ہٹ اینڈ رن کا کیس درج کرلیا ہے۔