کنداپور30؍ستمبر (ایس او نیوز) یہاں سے قریب کوڈی نامی علاقے میں اتوار کی چھٹی کے پیش نظرشام کا وقت ساحل پر دوستوں کے ساتھ والی بال کھیلنے میں گزارنے والا ایک نوجوان طالب علم سمندرمیں بہہ گیا ہے۔

ذرائع کے مطابق منوج پجاری (۱۸سال) ساحل پراپنے دوستوں کے ساتھ والی بال کھیل رہا تھا۔جب بال پانی میں گرگیا تو اسے پکڑنے کے لئے منوج سمندر میں اتر گیا۔ اسی وقت تیز موجیں اٹھنے لگیں اور منوج کو بہا لے گئیں۔ اس سے پہلے کہ اس کے ساتھی اس کو بچانے کی کوشش کرتے وہ سمندر میں غائب ہوگیا ۔

مقامی مچھیرے اورسیکڑوں نوجوان سمندر میں منوج کو تلاش کرنے میں لگ گئے ہیں۔ منوج اپنے ماں باپ کا اکلوتا بیٹا تھاجو اپنے والدین اور دو چھوٹی بہنوں کے ساتھ کوڈی میں ہی رہتاتھا۔وہ پی یو سی سال دوم میں زیر تعلیم تھا۔

کنداپور پولیس اسٹیشن میں معاملہ درج کرلیا گیا ہے۔