کنداپور :22؍جنوری (ایس او نیوز) کنداور دیہات کے سٹپاڑی کے ایک گھرمیں ہوئی چوری کے معاملے میں کنداپور دیہی پولس نے فوری کارروائی کرتے ہوئے اسی گھر میں کام کرنےو الے میاں بیوی کو صرف دو دنوں میں ہی گرفتار کر کے معاملے کو حل کرنے میں کامیابی حاصل کرلی ہے۔
ملزموں کی شناخت اوپند میارکیری کے شری دھر (32) اور اس کی بیوی سواتی (26) کی حیثیت سے کی گئی ہے۔
سٹپاڑی کے دینکر شٹی کے گھر میں 20جنوری کی شام 30-6 بجے گھر کو قفل لگا کر دونوں اپنے قریبی رشتہ دار کے پروگرام میں شرکت کےلئے کوٹیشور ہال چلے گئے تھے۔ رات 10بجے جب گھر لوٹے تو گھر پر ہاتھ صاف کیا گیا تھا اور چور گھر کا دروازہ توڑ کر الماری میں موجود ایک ہیرے کا ہار، چار سونے کی چوڑیاں، ایک سونے کا ہار اور 36 ہزار روپئے نقد سمیت کل 3.56لاکھ روپئے کے اشیاء کی چوری ہوچکی تھی۔
دینکر شٹی نے چوری معاملے کو لےکر 21جنوری کو پولس تھانے میں شکایت درج کی اور بتایا کہ گھر کے نوکر فرار ہوگئے ہیں۔ ضلع ایس پی لکشمن نمبرگی کی ہدایت اور ایڈیشنل ایس پی کمار چندر کی رہنمائی میں کنداپور ڈی وائی ایس پی بی پی دنیش کمار اور کنداپور سرکل انسپکٹر ڈی آر منجپا کی طرف سے تشکیل کردہ کنداپور دیہی پولس تھانہ انسپکٹر شری دھر نائک کی قیادت والی ٹیم نے ملزموں کو منگل کے دن گرفتار کرلیا اور گھر سے چوری کردہ تمام زیورات کو ضبط کرلیا گیا۔
ملزموں کو آج منگل شام کو عدالت میں پیش کیا گیا جہاں انہیں عدالتی تحویل میں بھیج دیا گیا ہے۔ کارروائی میں سنتوش کمار، شری دھر، سجیت کمار، پدماوتی ، دیپا اور شیوانند شریک تھے۔