کنداپور میں زیورات چرانے والے کو پولیس نے کیا صرف 2گھنٹوں میں گرفتار
کنداپور25؍نومبر(ایس او نیوز)پی ڈبلیو ڈی کوارٹرز کے ایک مکان کا تالا توڑ کر د ن دہاڑے زیورات اڑالے جانے والے چور کو پولیس نے صرف 2گھنٹوں کے اندر گرفتار کرلیا ۔
گرفتار شدہ چور کا نام ہریش اچاریہ (46سال) ہے جو کہ کومباشی کا رہنے والا ہے۔موصولہ رپورٹ کے مطابق پی ڈبلیو ڈی کوارٹرز میں موجود روی کے گھر پر جب کوئی موجود نہیں تھا تو ہریش نے اس کے مکان کا تالاتوڑنے کے بعد گھر کے اندر سے زیورات چوری کیے اور پچھلے دروازے سے فرار ہوگیا۔ چوری کا پتہ اس وقت چلا جب روی کی بیوی اسپتال سے لوٹی اورگھر کا دروازہ کھلا ہوا پایا۔ اس نے زیورات چوری ہونے کی شکایت جیسے ہی پولیس اسٹیشن میں درج کروائی پولیس نے مستعدی سے کارروائی کرتے ہوئے 2گھنٹوں کے اندرہریش اچاریہ کو کنداپور مارکیٹ سے گرفتار کرلیا۔اس کے قبضے سے مسروقہ زیورات بھی بر آمد کرلیے گئے ہیں۔چوری کی مزید وارداتوں میں ہریش کے ملوث ہونے کے تعلق سے پولیس مزید تفتیش کررہی ہے۔