کنداپور پولیس اسٹیشن کے اندر دوگروہوں کے درمیان مارپیٹ ۔2خواتین زخمی
کنداپور،6؍دسمبر (ایس او نیوز) شیڈول کاسٹ کے دو گروہ جو اپنا تنازعہ حل کرنے کے لئے پولیس اسٹیشن میں آئے تھے، پولیس عملے کے سامنے ہی آپس میں مارپیٹ پر اتر آئے جس کے نتیجے میں 2خواتین زخمی ہوگئیں، جن کو علاج کے لئے اسپتال میں داخل کیا گیا ہے۔
کہا جاتا ہے کہ کوٹا گرام پنچایت میں دلتوں کے اندر قانونی بیدار لانے اور مختلف سرکاری اسکیموں سے متعلقہ سہولتیں فراہم کرنے کے لئے ایک کیمپ منعقد کیا گیا تھا۔اس پروگرام میں پنچایت ترقیاتی افسر اور سکریٹری موجود نہ رہنے کو مسئلہ بناتے ہوئے دلتوں کے ایک گروپ نے مذکورہ پروگرام منسوخ کرنے کا مطالبہ کیا۔ پنچایت کے اراکین نے ان کا مطالبہ نہ مانتے ہوئے پہلے سے طے شدہ پروگرام کو آگے بڑھایا۔ایڈوکیٹ منجوناتھ گیلیار نے جب قانونی معلومات پر اپنا لیکچر شروع کیا تو ایک دلت لیڈر شیام نے بار بار رکاوٹ پیدا کرنے کی کوشش کی جس سے ایڈوکیٹ منجوناتھ اور شیام کے بیچ زبانی تکرار شروع ہوگئی۔ اس موقع پرایک دلت تنظیم سے وابستہ کچھ لوگ وہاں پہنچے اور ہنگامہ کھڑا کردیا۔
پھراس کے بعد دلتوں کے ایک گروپ نے کوٹا پولیس اسٹیشن پہنچ کر پنچایت صدر ونیتا سریدھر اچار کے خلاف شکایت کرتے ہوئے کہا کہ اس نے ہنگامے کے دوران دلتوں کا مذاق اڑایا ہے اس لئے اسے معافی مانگنی چاہیے ورنہ دلتوں کے تحفظ سے متعلق قانون کے تحت اس کے خلاف کیس درج کردیا جائے۔ اس مطالبے پر دلت سنگھرش سمیتی کے اعتراض سے دو گروہوں کے درمیان اختلاف پیدا ہوگیا اوراس دوران آرتی نامی ایک خاتون نے ایک دلت لیڈر پر حملہ کردیا۔ اس کے ساتھ ہی پولیس اسٹیشن کے اندر ہی دوگروہوں کے بیچ مارپیٹ شروع ہوگئی۔ پولیس نے بڑی مشکل سے اس ہنگامے پر قابو پایا او ردونوں زخمی خواتین کو علاج کے لئے اسپتال میں منتقل کردیا۔