کنداپور ایم ایل اے ہالاڈی سرینواس شیٹی نے دیا استعفیٰ۔ بی جے پی میں شمولیت یقینی!
کنداپور، 30؍جنوری (ایس او نیوز) بہت سے آزاد رکن اسمبلی ہالاڈی سرینواس شیٹی کے اگلے قدم کا معاملہ جو مبہم بنا ہوا تھا اس کے تعلق سے اب صاف ہوگیا ہے کہ وہ جلد ہی باضابطہ طور پر بی جے پی میں شامل ہونے جارہے ہیں۔
موصولہ رپورٹ کے مطابق بی جے پی کے کرناٹکا معاملات کے نگران پرکاش جاوڈیکرنے حال ہی میں اپنے ا ڈپی دورے کے موقع پر سرینواس شیٹی سے انہی کی رہائش گاہ پر خفیہ ملاقات کی تھی اور انہیں جنوری کے آخری ہفتے میں مستعفی ہونے کا مشورہ دیا تھا۔ اسی بنیاد پراب سرینواس شیٹی نے اسمبلی کی رکنیت
سے استعفیٰ دے دیا ہے۔خود انہوں نے کہا ہے کہ جیسے ہی اسپیکر کی طرف سے ان کا استعفیٰ قبول کیا جائے گا، وہ بی جے پی میں شامل ہوجائیں گے۔
حالانکہ سرینواس شیٹی کے حامیوں کا ایک بڑا حلقہ ہے اور کافی اثر والی شخصیت ہے، مگر اس کے باجود خود بی جے پی کے اندرایک بڑا طبقہ ایسا ہے جو ہالاڈی سرینواس کو پارٹی میں شامل کیے جانے کا سخت مخالف ہے۔ اس کا مظاہرہ پریورتن یاترا کے دوران بھی ہوچکا ہے جس میں پارٹی کے صدر ایڈی یورپّا کی موجودگی میں سرینواس شیٹی کی مخالفت میں نعرے بازی کی گئی تھی۔ اس وقت ہی یہ صاف ہوگیا تھا کہ الیکشن قریب آتے ہی سرینواس شیٹی بی جے پی کیمپ میں شامل ہوجائیں گے ، کیونکہ اس وقت ایڈی یورپّا نے مظاہرین پر واضح کردیا تھاکہ آئندہ الیکشن میں کنداپور سے سرینواس شیٹی ہی بی جے پی کے امیدوار ہونگے ، اس لئے جو لوگ ان کی مخالفت کررہے ہیں وہ اجلاس باہر چلے جائیں۔
بہرحال اس سیاسی ڈرامے کا ایک سین ختم ہوگیا اور آئندہ دنوں میں شاید مزید دوسرا سین سامنے آجائے گا۔