سنگھ پریوار کو ایک جہتی اور بھائی چارگی کی ضرورت نہیں ہے: کنداپور میں سی پی آئی (ایم) کی بائک ریلی اور احتجاجی اجلاس
کنداپور :24/فروری (ایس او نیوز) گائے سپلائی ، ڈریس کوڈ، دھرم رکشھناکے متعلق نوجوانوں میں نفرت کے بیج بو کر انہیں غلط راہوں پر ڈال کر سماج کو خراب کرنے کا کام سنگھ پریوار کررہاہے۔ سنگھ پریوار کو بھائی چارگی اور یک جہتی کی ضرور ت نہیں ہے ۔ ان کی غنڈہ گردی سے خوف کھائے بغیر آئیکتا ریلی کو کامیاب بنایا جائے گا۔ ان باتوں کا اظہار سی پی آئی ایم کنداپور کے سکریٹری ایچ ، نرسمہا نے ظاہر کیا۔
سنگھ پریوارنے منگلورو میں منعقدہونے والی اتحاد ریلی کی مخالفت میں 25فروری کو ہرتال کا اعلان کیا ہے، اور اُلال میں موجود سی پی آئی ایم کے دفتر کو آگ لگائی ہے، شرپسندوں کی کارستانی کی کڑی مذمت میں کنداپور اور بیندور علاقہ کی طرف سے جمعہ کو کنداپور کے شاستری سرکل پر احتجاجی اجلاس سے وہ خطاب کررہے تھے ۔ انہوں نے کہاکہ جمہوری طریقے سے منتخب کیرلا کے وزیر اعلیٰ پنرائی وجین پاکستان سے نہیں آرہے ہیں، انہیں روکنے کاحق کسی کو نہیں ہے، انہوں نے مطالبہ کیا کہ لوگوں میں خوف کا ماحول پیدا کرکے اپنا مفاد حاصل کرنےکے لئے سنگھ پریوارکے غنڈہ لیڈر ان کو گرفتار کرکے انہیں سرحد پار کیا جائے۔ سی پی ایم بیندور کے سکریٹری سریش کلاگر نے خطاب کرتے ہوئے کہاکہ کمیونسٹوں کے متعلق ہندو تنظیموں کے لیڈران غلط باتوں کو پھیلا رہے ہیں، اگر انہیں امبیڈکرکے لکھے ہوئے دستور پر اعتماد ہوتا تو وہ ایسا نہیں کرتے ، انہوں نے الزام لگایا کہ دستور مخالف کام کرنے والے سنگھ پریوار کے لیڈران ہی حقیقی دیش دروہی ہیں۔ سی پی ایم کے ریاستی سکریٹری کے شنکر، لیڈران داس بھنڈاری، اشوک ، سنتوش ہیماڑی، راجا ، گنیش کلاگر، منجوناتھ شوگن، راجیش ، روی وغیرہ موجود تھے۔ اس سے قبل ڈی وائی ایف آئی بیٹاگر دفتر سے کے، شنکر نے بائک ریلی کو ہری جھنڈی دکھائی ۔