کمٹہ سے بی جے پی ٹکٹ کے متوقع امیدوارسورج سونی دہلی میں گرفتار
نئی دہلی/ کمٹہ، 16؍مارچ (ایس او نیوز) کچھ دنوں پہلے غیر قانونی طور پر گائیں لے جانے کے الزام میں بھیڑ نے ہوناورکے قریب بھٹکل کے دو افراد پر قاتلانہ حملہ کیا تھا، اس معاملے میں پولیس کو مطلوب کمٹہ کے بی جے پی لیڈر اور اسمبلی ٹکٹ کے امیدوار سورج نائک سونی کو دہلی سے گرفتار کیے جانے کی اطلاع موصول ہوئی ہے۔
خیال رہے کہ قتل کی کوشش کے لئے تعزیرات ہندکی دفعہ 307کے تحت پولیس نے تقریباً127افراد پر کیس داخل کررکھا ہے۔ چند کی گرفتاری عمل میں آئی ہے اور بہت سارے لوگ روپوش ہوگئے ہیں۔پولیس کو مطلوب ملزمین میں سورج سونی کا نام بھی شامل تھا۔پولیس کی اس کارروائی کے خلاف ہندوتوا حامی تنظیموں نے آواز اٹھاتے ہوئے گرفتاریوں کا سلسلہ روکنے کا مطالبہ کیا تھااور بصورت دیگر زبردست احتجاج کی دھمکی دے رکھی تھی۔
اسی دوران پتہ چلا ہے کہ سورج سونی پارٹی کے کسی کام سے دہلی کے لئے گیاہوا تھا،لیکن پولیس نے اسے دہلی نظام الدین ریلوے اسٹیشن پر گرفتار کرلیا ہے۔گزشتہ اسمبلی الیکشن میں سونی بی جے پی کا امیدوار تھا مگر وہ انتخاب ہار گیا تھا۔اس مرتبہ بھی سونی کمٹہ سے بی جے پی کا متوقع امیدوار ہے۔
سورج کی گرفتاری کی خبرعام ہوتے ہی فیس بک پر اپیل جاری کی گئی ہے کہ کل صبح 9بجے بی جے پی کے تمام کارکنان کمٹہ میں پارٹی دفتر کے پاس جمع ہوجائیں۔ابھی یہ معلوم نہیں ہوسکا ہے کہ مقامی طور پر بی جے پی کا اگلا اقدام کیا ہوگا۔
اس دوران ان کی زوجہ ، ضلع پنچایت ممبر وینا سور ج نائک نے شوہر کی گرفتاری پر سخت اعتراض کرتےہوئے بیان جاری کیا ہے کہ صرف موبائیل لوکیشن کی بنیاد پر 307کا کیس درج کرتےہوئے میرے شوہر کو گرفتارکیاگیا ہے۔ بے وجہ کیس درج کئےجانے پر ان کی بیوی نے بے اطمینانی کا اظہار کیا ہے۔
