بھٹکل 27؍اپریل (ایس او نیوز)بھٹکل تعلقہ پنچایت نائب صدر کے طورپر منتخب رادھا اشوک وئیدیا کی رکنیت کو شیڈول ٹرائب (ایس ٹی ) سرٹفکیٹ کے مسئلے پر کمٹہ تحصیلدار کی جانب سے باطل قرار دینے کی بات سامنے آئی ہے۔

ذرائع سے ملی اطلاع  کے مطابق رادھا اشوک وئیدیا کا مائیکہ کمٹہ کے گوجر گلّی علاقے میں ہے۔ گزشتہ پندرہ سال قبل رادھا کی شادی بھٹکل میں ہوئی تھی۔ لیکن اس سے قبل ہی رادھا نے کمٹہ تحصیلدار سے اپنی ذات سرٹفکیٹ ایس ٹی کے طور پر بنوالی تھی۔پتہ چلا ہے کہ اب کمٹہ کے موجودہ تحصیلدار نے منڈلّی گرام پنچایت کی رکن اور تعلقہ پنچایت کی نائب صدر کے عہدے پر فائز رادھااشوک وئیدیا کو ایس ٹی سرٹی فیکیٹ کو جانچ کے لئے پیش کرنے کا نوٹس دیاتھا۔ مگر اس نے اس نوٹس کو سنجیدگی سے نہیں لیا اور کمٹہ تحصیلدار کے سامنے اپنی سرٹی فکیٹ جانچ کے لئے پیش نہیں کی۔

جب رادھا کی طرف سے اس معاملے میں تعاون نہیں کیا گیا تو ضلع ڈپٹی کمشنرایس ایس نکول کی ہدایت پر کمٹہ تحصیلدار میگھ راج نے رادھا کا ایس ٹی ذات سرٹفکیٹ منسوخ کردیا جس سے گرام پنچایت اور تعلقہ پنچایت سے رادھا کی رکنیت باطل قرارپائی ہے۔ معلوم ہوا ہے کہ رادھا اشوک وئیدیا نے اس معاملے میں ہائی کورٹ میں اپیل داخل کی ہے۔