کمٹہ پہاڑی پر مِنی ایئر پورٹ کے لئے جگہ کی نشاندہی۔۔۔ تین کیلو میٹر لمبا اور تین سو میٹر چوڑا ہوگا رن وے
کمٹہ :23/مارچ(ایس اؤ نیوز)کچھ دن قبل ساحل آن لائن نے اپنے قارئین کو خبر دی تھی کہ ریاستی بجٹ میں اترکنڑا ضلع کو منطورکردہ ائیر اسٹریپ کمٹہ کے مورور پہاڑ پر تعمیرہوگی۔ اسی کے فالو اپ کے تحت ائیر اسٹریپ کی تعمیر ات کا جائزہ لینے کے لئے خصوصی افسران پر مشتمل ایک ٹیم مورو ر پہاڑ ی پر پہنچ کر جگہ کا معائنہ کیا ہے، جس کے ساتھ ہی ایئر پورٹ کی تعمیر کی سرگرمیاں تیز ہوگئی ہیں۔موصولہ رپورٹ کے مطابق تحویل اراضی کے خصوصی ضلع کمشنر سداشیو پربھو کی قیادت میں ایک ٹیم نے کمٹہ کی مورور پہاڑی پر مجوزہ مِنی سوِل ایئر پورٹ کے لئے مجوزہ زمین کا معائنہ کیا ہے۔
اخباری نمائندوں سے گفتگو کرتے ہوئے خصوصی ڈی سی سداشیو پربھو نے بتایا کہ ریاستی صنعتی اور بنیادی سہولتوں کے کارپوریشن کی طرف سے پیش کی گئی تجویز کے مطابق اس منی ایئر پورٹ کے لئے ضروری زمین کی نشاندہی سیٹلائٹ کے ذریعے کرلی گئی ہے۔ جس کا رقبہ 60ایکڑ ہے۔ اس میں رن وے کی لمبائی 3کیلو میٹر اور چوڑائی 300میٹر ہوگی ۔
مسٹر پربھو نے کہا کہ اس منی ایئر پورٹ کے لئے کئی مقامات پرمعائنہ کیا جاچکا ہے مگر سب سے زیادہ مناسب جگہ کے طور پر مورور پہاڑی کو چُنا گیا ہے، کیونکہ ایئر پورٹ سے متعلقہ دیگر تمام تعمیرات کے یہاں 300ایکڑ سے زیادہ بہترین زمین دستیاب ہے۔اس معائنے کے بعد سول ایوی ایشن(شہری ہوابازی) کے تکنیکی ماہرین کی ٹیم اس مقام کا معائنہ کرے گی اور قطعی فیصلہ کرے گی۔ابتدائی رپورٹ کے بعد جنگلاتی زمین کو اس مقصد کے لئے حاصل کرنا ہوگا، جس کے لئے مرکزی سرکار کی طرف سے ضروری اقدام کیا جانا ہوتا ہے۔اس منصوبے کی وجہ سے پیدا ہونے والے مسائل کا ضروری جائزہ ریاستی محکمہ کی طرف سے لیا گیا ہے اور اس منصوبے کے لئے نجی زمین کو تحویل میں لینے کے سلسلے میں اقدامات کیے جائیں گے ۔
بعض ذرائع سے ملنے والی اطلاع کے مطابق اس منی ایئر پورٹ کے لئے کمٹہ مورور سڑک کو دوسری طرف منتقل کیا جائے گا اور کچھ حد تک نجی زمینات کو بھی تحویل میں لیا جائے گا۔کیونکہ منصوبے کے مطابق جہاں رن وے تعمیر کیا جانے والا ہے اسی مقام پر فی الحال کمٹہ مورور سڑک اور نجی اراضی موجود ہے۔