کمٹہ/سرسی:12/ستمبر(ایس اؤ نیوز) ملناڈ اور ساحل کو جوڑنے والی اہم کڑی کے طورپر معروف سرسی۔ کمٹہ سڑک پر اگلے چند دنوں میں سواریوں کی نقل وحمل مکمل طورپر بند ہوجائے گی۔ وجہ یہ ہے کہ نیشنل ہائی وے اتھارٹی نے علاقے کے عوام کی دیرینہ مانگ کمٹہ۔ سرسی روڈ کو قومی شاہراہ میں منتقل کرنے کاکام نومبر سے شروع کرنےو الی ہے۔ جس کے لئے وہ ضلع ڈی سی کے حکم کے انتظارمیں ہیں۔ فی الحال کمٹہ ۔ سرسی سڑک کو پی ڈبلیو ڈی محکمہ نے نیشنل ہائی وے اتھارٹی کو منتقل کیا ہے۔
محکمہ پی ڈبلیو ڈی کی طرف سے این ایچ اے کو منتقل کئے جانے کے بعداب این ایچ اے کے افسران سڑک تعمیر کام کے لئے اترکنڑا ڈپٹی کمشنر کی منظوری کے انتظار میں ہیں۔ ڈی سی کی اجازت ملتے ہی قومی شاہراہ میں منتقلی کاکام شروع ہوجائے گا۔ جس کے نتیجےمیں سرسی شہر کمٹہ ،انکولہ اور کاروار سے کافی دور ہونے کے علاوہ عوام کے لئے پریشانی کا باعث بھی ہوگا۔ کمٹہ ۔ سرسی شاہراہ کو قومی شاہراہ کی منتقلی علاقے کے عوام کا ایک دیرینہ خواب رہاہے، امکان ہے کہ شاہراہ تعمیر کاکام نومبر سے شروع ہوگا۔ اس سلسلے میں این ایچ اے کے افسران نے ضلع ڈی سی کو خط لکھتے ہوئے کمٹہ ۔ سرسی سڑک کو 18مہینے بند رکھنےکی اجازت طلب کی ہے۔
کمٹہ اور سرسی کی دوری قریب 60کلومیٹر بتائی جارہی ہے جس کواندازاً370کروڑ روپیوں کی لاگت سے قومی شاہراہ میں منتقل کیا جائے گا۔شاہراہ کا تعمیری کام ماہ نومبر سے شروع ہوگا، کام مکمل ہونے تک سڑک بند کرکے سہولت مہیا کرنے اتھارٹی نے ڈی سی کو خط لکھا ہے۔ ضلع ڈی سی 18نے ماہ کمٹہ ۔سرسی راستے کو بند کرنے والی درخواست کو سنجیدگی سے لیتے ہوئے محکمہ آب پاشی، محکمہ نقل و حمل ، محکمہ پولس سمیت کئی محکمہ جات سے رائے مانگنے کی اطلاعات موصول ہوئی ہیں۔ جب سڑک بند کی جائے تو اس دوران متبادل انتظامات ، عوام کودرپیش مشکلات جیسے مسائل پر محکمہ جات کی رپورٹ مانگی گئی ہے ، ان رپورٹوں کی بنیاد پر ڈی سی ، اتھارٹی کو اپنا جواب ارسال کرنے کی جانکاری ملی ہے۔
اس سلسلے میں نیشنل ہائی وے اتھارٹی کے ذمہ دار کرنل جانباس نے اخبارنویسوں سے بات کرتے ہوئے کہاکہ کمٹہ ۔ سرسی روڈ بند کرنے کی منظوری کے لئے ڈی سی کو خط لکھا گیا ہے۔ اس کے ساتھ ساتھ سڑک کی توسیع کے لئے ضروری فاریسٹ اور ہیسکام محکمہ جات کے کاموں کےلئے بھی اجازت طلب کی گئی ہے۔ نومبر کے مہینے سے کام شروع کرنے کی امید لئے ڈی سی کے حکم نامہ کے انتظار میں رہنے کی بات کہی۔ کرنل جانباس نے بتایا کہ کمٹہ سے دیگر علاقوں کوجانےکے لئے متبادل راہوں کی جانکاری بھی دی گئی ہے۔ اب مقامی عوام سے بس، سواریوں کی آنے اور جانے کے لئے گفتگو کرنے کے بعد متبادل انتظام کیا جائے گا۔ کمٹہ ۔ سرسی سڑک بند ہونے پر صرف کمٹہ نہیں بلکہ کاروار، انکولہ، بھٹکل ، منگلورو کی طرف جانے والی سواریوں کو بھی لازماً پریشانی ہوگی۔ کاروار ،انکولہ اور دیگر مقامات کو جانےو الوں کے لئے یلاپور سے اور کمٹہ جانے والوں کو سداپور بڈال گھاٹ سے جانے کے لئے متبادل کے طورپر سفارش کئے جانے کی جانکاری دی ۔