کمٹہ:22/ اکتوبر (ایس اؤنیوز)شہر کے قومی شاہراہ سے متصل قریب 2ایکڑ زمین پر پھیلے کتور چنما باغ کی سرکاری ملازمین نے پاکی صفائی کرتے ہوئے باغ کو ایک نیا روپ دیاہے۔ مختلف محکمہ جات کے عملے نے پسینہ بہاتے ہوئے کانٹے ،جھاڑیاں اورڈھیر سارا کچر ا صاف کرکے سیر و تفریح کے لئے بہترین انداز میں موزوں بنایا ہے۔
چنما باغ کے ایک جگہ پر پچھلے کچھ برسوں سے بلدیہ کی عمارت تعمیر کی جارہی تھی جو حال ہی میں مکمل ہونے کے بعد اس کا افتتاح ہوچکا ہے۔ لیکن روزانہ سیکڑوں لوگ بلدیہ کو آتےجاتے رہتے ہیں اسی عمارت سےمتصل باغ گندگی سے بھرا پڑا تھا۔ حالیہ دنوں منائی گئی سوچھیتا مہم کے دوران کچھ دن پہلے تبادلہ ہوئے اسسٹنٹ کمشنر رمیش کلسد کے دور میں باغ صفائی کو جاری کیا تھا ، شہر میں موجود ہر محکمہ کے قریب 200سے زائد سرکاری عملے نے صبح 7بجے سے 9بجے تک باغ کی صفائی کرنےکے نتیجے میں باغ میں نئی جان آئی ہے۔ اس سے قبل باغ میں اتنی جھاڑیاں اور کانٹوں کے درخت اگ گئے تھے کہ باغ سے پڑوس کی بلدیہ عمارت بھی نظر نہیں آتی تھی ۔ باغ میں ہی ایک کنارے باغ کے تمام کچرے کو جمع کرکے کھاد تیار کرکے دوبارہ باغ کے لئے استعمال کئے جانے کا انتظام بھی یہیں کئے جانے کی جانکاری بلدیہ کے ایک عملے نے دی۔
بلدیہ کے ماحولیاتی انجنئیر ناگیندر گاؤنکر نے سوچھیتا کے متعلق بتایا کہ کتورچنما باغ کے علاوہ شہر کے وویک نگر کا باغ، چترگی اور زرعی بازار کے قریب موجود شمشان کو بھی پاک صاف کیا گیا ہے۔ ہمارے کا م کو دیکھتےہوئے کئی اساتذہ اور طلبا نے بھی قومی شاہراہ کناروں کو پاک صاف کرنے میں تعاون کیا ہے۔ باغ کے لئے رقم منظور ہوئی ہے جس سے باغ میں بچوں کے لئے کھیلنے کے اشیاء، کھلا جم، مختلف پھولوں کے لئے خرچ کئے جانےکی جانکاری دی ۔ اسی طرح باغ میں داخلے کے لئے مناسب فیس طئے کرتے ہوئے باغ کی صفائی کو ترجیح دئیے جانے کی بات کہی۔