کمٹہ پنچایت صدر کے خلاف سوال اُٹھانے پر پنچایت ممبر کی دکان پر حملہ؛ دکان منہدم، مزدور پر جان لیوا حملہ
کمٹہ:30/مئی (ایس اؤ نیوز )گرام پنچایت میں جاری بد عنوانیوں کے متعلق اسی گرام پنچایت کے ایک ممبر نے ضلع ڈپٹی کمشنر کو شکایت کرنے پرناراض گرام پنچایت صدر کے بھائیوں نے متعلقہ ممبر سے منسلک مزدور پر جان لیوا حملہ کرنے کا واقعہ کمٹہ تعلقہ ہولنگدے دیہات میں آج منگل کو پیش آیا ہے۔
ذرائع سے ملی اطلاع کے مطابق ہولنگد ے گرام پنچایت کے صدر راگھویندر پٹگار کے بھائی تکارام پٹگار اورچچا ایشور پٹگار نے پرانی دشمنی کا بدلہ لینے کے لئے پنچایت کے ممبر ماروتی شیٹھ کی دکان کے مزدور پر جان لیوا حملہ کیا۔ بتایا جارہاہے کہ ہولنگدے پنچایت میں بدعنوانی کا دور دورہ تھا ہر کوئی اپنی جگہ خاموش تھا کوئی پوچھ نہیں رہاتھا تو پنچایت کے ممبر ماروتی شیٹھ نے پنچایت میں جاری بدعنوانی کے متعلق نہ صرف سوال کیا بلکہ پوری تفصیل ضلع ڈی سی کو لکھ بھیجی۔ماروتی نے شکایت میں کہا کہ پنچایت صدر نے متاثرین کی زمین کو اتی کرم کرتے ہوئے اپنا مکان تعمیر کیا ہے۔الزام لگایا گیا ہے کہ ماروتی نے جب پورے ثبوتوں کے ساتھ اپنی بات افسران تک پہنچائی تو مشتعل پنچایت صدر نے اپنے بھائی اور چچا کے ذریعے جان لیوا حملہ کروایا۔
بتایا گیا ہے کہ پنچایت کے صدر کے بھائی اورچچا نے ماروتی شیٹھ پر حملے کا اراہ لے کر اس کی کشن کی دکان پر پہنچے اور دکان کو پوری طرح منہدم کرنے کے بعد دکان کے باہر سوئے ہوئے مزدور گنیش پٹگار پر بلیڈ سے حملہ کرتے ہوئے جان لینے کی کوشش کی۔ معاملے کو لے کر کمٹہ پولس تھانے میں کیس درج کرلیا گیا ہے۔ پولس مزید چھان بین کررہی ہے۔
