کمٹہ میں پی یو دوم کے طالب العلم کی خودکشی؛ امتحانی خوف سے خودکشی کا شبہ
کمٹہ :22/مارچ(ایس اؤ نیوز) تعلقہ کے الویکوڑی میں پی یو دوم کے ایک طالب العلم کی لاش اُسی کے مکان میں لٹکتی ہوئی پائی گئی، جس کے تعلق سے بتایا جارہا ہے کہ اُس نے خودکشی کی ہے۔ مہلوک کی شناخت گوتم کرشنا شٹیگار (18) کی حیثیت سے کی گئی ہے جو ڈاکٹر اے ایم بالیگا کامرس کالج میں پی یو سی دوم کا طالب العلم تھا۔ ذرائع کے مطابق گوتم کے والد کرشنا شٹیگار کا تعلق کنداپور سے ہے، مگر وہ کمٹہ کے الویکوڑی میں مقیم تھے۔
خودکشی کرنے کے تعلق سے سمجھا جارہاہے کہ غالباً اُس نے سالانہ امتحانات میں جوابی پرچے ٹھیک سے نہیں لکھا ہوگا اور ناکامی کے خوف سے خودکشی کیا ہوگا۔
بتایا گیا ہے کہ گوتم کا بزنس اسٹڈیز کا پر چہ مطمئن بخش نہیں ہونے سے وہ ذہنی تناؤ کا شکار تھا۔اس بات کی بھی اطلاع ملی ہے کہ اپنے بیٹے کو امتحانی دباؤ سے ذہنی تناؤ میں مبتلا دیکھ کر والدین نے اُسے شہر کے نجی اسپتال میں لے جاکر علا ج بھی کروایا تھا۔ لیکن دوپہر میں جب گھر میں کوئی نہیں تھا تو اُس نے اپنے روم میں پھانسی لگا کر خود کشی کرلی۔
گوتم کے متعلق ملی جانکاری کے مطابق گوتم کلاس میں بہت ہی سنجیدہ تھا کسی بھی معاملے میں شامل نہیں ہوتاتھا، اپنی پڑھائی اور اپنے کام کی حد تک ہی رہتاتھا، جس کی بنا پرزیادہ دوست بھی نہیں تھے، کچھ کھیل مقابلوں میں حصہ لیتاتھا، ہمیشہ امتحان میں اچھے نمبرات سے کامیاب ہوتا تھا۔
خودکشی کے سلسلے میں کمٹہ پولس تھانے میں کیس درج کیا گیا ہے اور پولس مزید چھان بین کررہی ہے۔