کمٹہ:11/ جنوری (ایس اؤنیوز)تعلقہ کے دونڈکُلی کے مکینوں نے بدھ کو قومی شاہراہ کی تعمیر کرنے والی کمپنی آئی آر بی کو کام کرنے سے روکتے ہوئے پرزور مطالبہ کیا کہ قومی شاہراہ کی تعمیرسے پہلے مقامی لوگوں کو ہائی وے کراس کرنے کے لئے انڈر پاس کی تعمیر کریں۔

مکینوں نے بتایا کہ دونڈکلی دیہی علاقہ سےگزرنے والی فورلین شاہراہ کے ایک طرف دیہات آباد ہے تو شاہراہ کے دوسرے کنارے سرکاری اسکول ہے، طلبا کو ہائی وے کراس کرکے اسکول پہنچنا خطرے سے خالی نہیں ہے۔ اس کے علاوہ اور کئی مشکلات در پیش ہیں، اسی لئے علاقہ میں انڈر پاس کی مانگ کی جارہی ہے، مکینوں نے کمپنی ذمہ داران کو انتباہ دیا ہے کہ اگر ان کی مانگ پوری نہیں کی گئی تو وہ فورلین تعمیر ی کام کو ہونے نہیں دیں گے۔

فورلین تعمیر ی کام کو روک کر انڈرپاس تعمیر کا مطالبہ کررہے مکینوں اور عوام کے احتجاج کی اطلاع اسسٹنٹ کمشنر لکشمی پریا کو ملی تو وہ فوراً جائے وقوع پر پہنچ کر آئی آر بی کمپنی کے ذمہ داران اور مکینوں کے ساتھ گفتگوکی اس دوران کمپنی اور عوام کے درمیان گرما گرم بحث بھی ہوئی ۔ سی پی آئی سنتوش نے عوام کو سمجھا کر انہیں مطمئن کرنے میں کامیاب ہوئے ۔ اس کے بعد مکینوں نے اسسٹنٹ کمشنر کو اپنے مطالبات پر مشتمل میمورنڈم سونپا۔

اسسٹنٹ کمشنر لکشمی پریا نے عوامی مطالبہ پر کہاکہ میمورنڈ م کو دہلی میں موجود متعلقہ حکام  کو روانہ کیا جائے گا، دہلی سے منظوری کے بعد عوام کی مانگ کے مطابق انڈر پاس تعمیر کیا جائے گا۔ اس موقع پر سینکڑوں مکین اور عوام موجود تھے۔