یوم آزادی کی تقریب میں کمٹہ کالج پرنسپال کی نشے کی حالت میں شرکت
کمٹہ 18؍اگست (ایس او نیوز)کمٹہ کے سرکاری فرسٹ گریڈ کالج میں یوم آزادی کی پروقار تقریب کے دوران کالج کے عبوری پرنسپال کی غیر ذمہ دارانہ اور شرمناک حرکت نے ہر ایک کو حیرت میں ڈال دیاہے۔
ذرائع سے ملی خبر کے مطابق عبوری پرنسپال آر ایم گوڈا پرچم کشائی کی تقریب کے لئے شراب کے نشے میں مدہوش ہوکر اس حالت میں پہنچے کہ ان کے لئے اپنے آپ کو سنبھالنا اور دو قدم بھی چلنا دشوار ہوگیاتھا۔کہتے ہیں کہ جب قومی ترانہ گایا جارہا تھاتو ان کی حالت بہت ہی مضحکہ خیز ہوگئی تھی اور مدہوشی کے عالم نے انہوں نے دو دو بار طلبہ سے خطاب کیا۔ بالآخر طلبہ نے ان کا ہاتھ پکڑ کرسہارادیتے ہوئے پرنسپال کے کمرے تک لے جانے کاکام کیا۔جبکہ کالج کا اسٹاف اپنے پرنسپال کی اس شرمناک حالت پر ندامت کا اظہار کررہاتھا۔ پتہ چلا ہے کہ کالج میں اپنے فرائض کی ادائیگی کے دوران پرنسپال گوڈا ہمیشہ نشے کی حالت میں ہی رہتے ہیں۔
طلبہ کی زندگی سنوارنے اور انہیں بہتر اخلاق و کردار کی تعلیم دینے کی ذمہ داری سنبھالنے والے پرنسپال کی درگت دیکھ کر سب حیران تھے کہ اگر یہی صورتحال رہی تو آخراس ملک کا مستقبل کس طرح روشن اور تابناک ہوسکتا ہے۔عوام کا مطالبہ ہے کہ محکمہ تعلیم کی طرف سے اس سلسلے میں پرنسپال کے خلاف کڑی کارروائی جانی چاہیے۔