یڈیورپا میرے صبر کا امتحان نہ لیں؛ حکومت کو گرانے کی بارہا کوشش بی جے پی کو زیب نہیں دیتی: کمار سوامی کا بیان
بنگلورو۔21؍ستمبر(ایس او نیوز) وزیر اعلیٰ ایچ ڈی کمار سوامی نے ریاستی بی جے پی صدر یڈیورپا کو متنبہ کیا ہے کہ بارہا ریاستی حکومت کو گرانے کی کوشش کرکے وہ ان کے صبر کا امتحان نہ لیں۔اگر یہ کوشش جاری رہی تو یڈیورپا کو اس کی بھاری قیمت ادا کرنی پڑے گی۔
شہر کی ساگراپولو اسپتال میں زیر علاج وزیر آبی وسائل ڈی کے شیوکمار کی عیادت کے بعد اخباری نمائندوں سے بات چیت کرتے ہوئے کہاکہ یڈیورپا خود شیشے کے گھر میں بیٹھ کر دوسروں پر پتھر پھینکنے کی حماقت نہ کریں۔2008میں جب یڈیورپانے اقتدار سنبھالا تھا تو اس وقت کہا تھا کہ دیوے گوڈا خاندان کو جیل بھیجیں گے،لیکن خود یڈیورپا کو جیل کی ہوا کھانی پڑی۔ اب کہہ رہے ہیں کہ ڈی کے شیوکمار کو جیل بھیجیں گے، پتہ نہیں پھر کب یڈیورپا جیل جارہے ہیں۔
انہوں نے کہا کہ یڈیورپا سیاسی امور پر بیان با زی کرنے میں کم از کم اپنی عمر کا تو خیال رکھیں اور ایسی زبان استعمال کریں کہ دوسری پارٹیوں میں ان سے جونیئر سیاست دان اگر اس کا جواب دیں تو ان کے وقار کا خیال رکھ سکیں۔ پتہ نہیں کیوں یڈیورپا کو خود اپنی عزت کا خیال نہیں ہے۔کمار سوامی نے کہاکہ یڈیورپا ایک سینئر اور تجربے کار سیاست دان ہیں۔ مخلوط حکومت پر تنقید کرتے وقت یڈیورپا کو چاہئے کہ اپنے زبان کو لگا م دے کر کام لیں ، کہیں ایسا نہ ہو کہ ہم جیسے جونیئر سیاست دان کوئی ایسی بات کہہ دیں جو یڈیورپا کے وقار کو مجروح کردے۔ یا پھر ان کاکوئی بیان یڈیورپا کو ہی مشکل میں ڈال دے۔
انہوں نے کہا کہ یڈیورپا ہر جگہ کہتے پھر رہے ہیں کہ باپ بیٹے لٹیرے ہیں، کیا یہ بیان ایسے بزرگ سیاست دان کو زیب دیتا ہے۔ انہوں نے کہاکہ دراصل یڈیورپا کرپشن میں فیصد رواج کے بانی ہیں۔ ہر ٹھیکے میں فیصد کا تعین یڈیورپا کی مہربانی سے ہوا ہے۔ شیورام کارت لے آؤٹ کے لئے بی ڈی اے نے جو زمین اکوائر کی تھی اس کے بڑے بڑے حصوں کو ڈی نوٹی فائی کرنے کے لئے یڈیورپانے رشوت کو فیصد کے حساب سے طے کرکے وصول کیا اور رشوت کے معاملے میں وہ اس قدر شفاف ہیں کہ وہ بھی چیک کے ذریعے لیتے ہیں۔ ان تمام معاملوں میں یڈیورپا بری نہیں ہوئے ہیں بلکہ صرف عدالت سے روک لگی ہے۔
یڈیورپا کے اس بیان پر کہ 18اراکین اسمبلی ممبئی روانہ ہونے والے ہیں۔ حکومت بہت جلد گرجائے گی۔ اس طرح کے تمام بیہودہ بیانات سے یڈیورپا گریز کریں۔ کمار سوامی نے کہا کہ حکومت کو گرانے کی یڈیورپا کی طرف سے جو بھی کوشش کی جارہی ہے وہ فضول ہے، اس میں وہ کبھی کامیاب ہونے والے نہیں ہیں۔ وہ جتنی بھی کوششیں کریں گے اس میں انہیں ناکامی کا ہی منہ دیکھنا پڑے گا۔ کمار سوامی نے دو قدم اور آگے بڑھتے ہوئے کہاکہ ریاست کی مخلوط حکومت کو کمزور کرنے کی کوششیں اگر جاری رہیں تو ریاستی عوام مشتعل ہوسکتے ہیں، اسی لئے بی جے پی راہ راست پر آجائے اور ایسی حرکتوں سے باز رہیں۔
وزیر اعلیٰ نے کہاکہ کسانوں کے قرضے معاف کرنے کے لئے ان پر ہمہ قسم کے دباؤ ڈالے گئے ، ان تمام کی پرواکئے بغیر انہوں نے قرضے معاف کئے۔ یہاں تک کہ بعض سرکاری افسروں نے بھی اس منصوبے کے نفاذ میں تعاون نہیں کررہے تھے اب جبکہ قرضے معاف کردئے گئے ہیں بی جے پی حکومت کے اس کارنامے کو ہضم نہیں کر پارہی ہے، انڈر ورلڈ اور مافیا کی مدد سے حکومت کو گرانے کی کوشش کی جارہی ہے۔ کمارسوامی نے کہاکہ حکومت کو گرانے کے لئے انڈر ورلڈ کے جو عناصر سرگرم تھے وہ بی جے پی کے مشن کی ناکامی کے سبب سری لنکا فرار ہوچکے ہیں۔