بنگلورو،22؍مئی(ایس او نیوز) کانگریس جے ڈی ایس مخلوط حکومت کی حلف برداری تقریب کے لئے تیاریاں تقریباً مکمل ہوچکی ہیں۔ چہارشنبہ کی شام 4:30؍بجے ودھان سودھا کے روبرو ایچ ڈی کمار سوامی کرناٹک کے 24ویں وزیراعلیٰ کی حیثیت سے حلف لیں گے۔ ان کے ساتھ کے پی سی سی صدر ڈاکٹر جی پرمیشور نائب وزیراعلیٰ کی حیثیت سے حلف لیں گے۔ ذرائع کے مطابق کل صرف یہ دو لیڈر ہی حلف اٹھائیں گے۔ اسمبلی میں کانگریس۔ جے ڈی ایس مخلوط حکومت اکثریت ثابت کرنے کے بعد ریاستی کابینہ کی تشکیل عمل میں آئے گی۔ کرناٹک میں کانگریس کے انچارج اور اے آئی سی سی جنرل سکریٹری کے سی وینوگوپال نے آج کہاکہ نئی ریاستی کابینہ میں بشمول نائب وزیراعلیٰ کانگریس کو 22وزارتیں ملیں گی جبکہ جے ڈی ایس کے حصہ میں 12؍وزارتیں جائیں گی۔ وینوگوپال نے یہ بھی امید ظاہر کی ہے کہ اسمبلی اسپیکر رمیش کمار ہوسکتے ہیں۔ جبکہ ڈپٹی اسپیکر کا عہدہ جے ڈی ایس کے لئے چھوڑدیا گیاہے۔ اس حلف برداری تقریب میں بشمول یوپی اے کی چیرپرسن سونیا گاندھی، کانگریس صدر راہل گاندھی اور کئی ایک ریاستوں کے وزراء اعلیٰ کے علاوہ 22؍ریاستوں سے اہم قائدین بھی شرکت کررہے ہیں۔ 

کیا ہوگاتیرا وعدہ: کانگریس جے ڈی ایس مخلوط حکومت کے نامزد وزیراعلیٰ ایچ ڈی کمار سوامی نے اپنی انتخابی مہم کے دوران بارہا اعلان کیاتھا کہ اگر ہماری حکومت آئی تو مکمل اختیارات کے ساتھ ایک دلت اور ایک مسلم لیڈر کو نائب وزیراعلیٰ بنایا جائے گا۔ اب کمار سوامی کی قیادت ہی میں کانگریس جے ڈی ایس مخلوط حکومت قائم ہورہی ہے۔ ڈاکٹر پرمیشور کی شکل میں ایک دلت نائب وزیراعلیٰ تو بن جائے گا۔ اس کے بعد کیا کمار سوامی ایک مسلم لیڈر کو نائب وزیراعلیٰ بنانے کا اپنا وعدہ پورا کرکے ریاست کرناٹک میں مسلمانوں کا ایک دیرینہ خواب پورا کریں گے؟ ویسے تو کانگریس کی جانب سے نائب وزیراعلیٰ پرمیشور کو بنایا جارہاہے۔ اب جے ڈی ایس کی جانب سے مزید ایک نائب وزیراعلیٰ بنایا جاسکتاہے۔ کمارسوامی کو انتخابی تشہیر کے دوران ایک مسلم لیڈر کو نائب وزیراعلیٰ بنانے کا وعدہ یاد ہے یا ملک کے چوٹی کے لیڈروں سے ملاقاتوں اور ریاست کے وزیراعلیٰ بننے کے ساتھ ہی اپنا وعدہ بھول جائیں گے۔ یہ ابھی سے کہنا قبل از وقت ہوگا۔ کیوں کہ جے ڈی ایس نے ابھی اپنے وزراء کے ناموں کا اعلان نہیں کیاہے۔

ملک میں تبدیلی کا عمل شروع: مارکسی کمیونسٹ پارٹی (سی پی ایم) اورہندوستانی کمیونسٹ پارٹی (سی پی آئی) کے لیڈر بھی کرناٹک میں ایچ ڈی کمارسوامي کے حلف برداری کی تقریب میں شرکت کریں گے ۔سی پی ایم کے جنرل سکریٹری سیتا رام یچوری نے آج یہاں اپنی پارٹی کے پولٹ بیورو کے اجلاس کے بعد صحافیوں کو بتایا کہ وہ بنگلور میں کل شام جنتا دل (ایس) اور کانگریس اتحاد کی حکومت کے حلف برداری کی تقریب میں شرکت کے لئے جائیں گے ۔ ان کے ساتھ کیرلا کے وزیر اعلیٰ اورپولٹ بیورو کے رکن پنارائی ویجن بھی ہوں گے ۔ اس دوران سی پی آئی نے بھی کہا ہے کہ اس کی پارٹی کے جنرل سکریٹری سدھاکر ریڈی اور قومی سکریٹری ڈی راجہ بھی حلف برداری کی تقریب میں شرکت کریں گے۔ یچوری نے کہا کہ کرناٹک انتخابات اور وہاں مسٹر کمارسوامی کی حکومت بننے سے ملک میں تبدیلی کی سیاست کا عمل کو شروع ہو گیا ہے ۔ اس کے ساتھ ہی 2019ء کے انتخابات میں بھارتیہ جنتا پارٹی (بی جے پی) اور سنگھ پریوار کو ہٹانے کا راستہ ہموار ہوا ہے ۔ ایک سوال پر انہوں نے کہا کہ متحدہ محاذ حکومت اور متحدہ اتحاد حکومت کی تشکیل سے پہلے کوئی مورچہ نہیں بنا تھا۔ لہٰذا 2019ء کے انتخابات سے پہلے بھی کوئی کل ہند مورچہ نہیں بنے گا بلکہ مودی حکومت کو ہٹانے کے لئے ترنمول کانگریس سمیت تمام غیر فرقہ وارانہ سیاسی پارٹی متحد ہوں گے اور سیکولر پارٹیز ساتھ ہوں گے لیکن مغربی بنگال میں ان کی پارٹی ممتا بنرجی کو ہٹانے کے لئے لڑے گی۔ انہوں نے کہا کہ محترمہ بنرجی نے تو پنچایت انتخابات میں جمہوریت کو تہس نہس کر دیا جس کا ثبوت پنچایت انتخابات میں دیکھنے کو ملا۔ کامیاب امیدواروں کوجیت کا سرٹیفکیٹ دیا گیا تھا لیکن یہ پتہ چلا کتنے ووٹ ملے ہیں۔

تیسرے محاذ کا پلیٹ فارم: کرناٹک میں چہارشنبہ کو جنتا دل (سیکولر)کے رہنما اور نامزد وزیر اعلیٰ ایچ ڈی کمارسوامی کی حلف برداری تقریب اگلے سال عام انتخابات میں بھارتیہ جنتا پارٹی(بی جے پی) کے خلاف متحدہ جدوجہد کے خاطر تیسرے محاذ کے طور پر ایک پلیٹ فارم بن سکتی ہے ۔جنتا دل (ایس) رہنما باسوراج ہیراٹی نے یہاں نامہ نگاروں سے کہاکہ مسٹر کمار سوامی کے وزیر اعلیٰ کے طورپر حلف برداری تقریب کے دوران سیکولر جماعتوں کے رہنماؤں کو ایک پلیٹ فارم پر آنے کا موقع ملے گا۔ انہوں نے کہاکہ ہم بی جے پی کے خلاف سیکولر جماعتوں کو ایک پلیٹ فارم فراہم کرارہے ہیں۔ ان میں کانگریس بھی شامل ہے۔ جنتا دل ایس نے غیر این ڈی اے اتحآد کے اہم رہنماؤں کو حلف برداری تقریب میں مدعو کیا ہے ۔ ان میں یو پی اے کی چیرپرسن سونیا گاندھی، کانگریس کے صدر راہل گاندھی، بی ایس پی کی سربراہ مایاوتی، مغربی بنگال کی گورنر ممتا بنرجی، کیرلا کے وزیر اعلیٰ پنارئی وجین ، دہلی کے وزیراعلیٰ اروند کجریوال، آندھرا پردیش کے وزیر اعلیٰ چندر بابو نائیڈو، تلنگانہ کے وزیر اعلیٰ کے چندر شیکھر راؤ، اترپردیش کے سابق وزیر اعلیٰ اکھلیش یادو، آر جے ڈی رہنما تیجسوی یادو، راشٹریہ لوک دل کے بانی اجیت سنگھ، ڈی ایم کے کے کارگذار صدر ایم کے اسٹالن اور فلم اداکار سے سیاست میں داخل ہونے والے کمل ہاسن شامل ہیں۔اس موقع پر جنتا دل ایس کے ترجمان رمیش بابو نے کہاکہ ملک میں غیر اعلانیہ ایمرجنسی کی صورت حال ہے اور سیکولر جماعتوں کے لئے مستقبل کا پروگرام طے کرنے کا اب وقت آگیا ہے۔